Europa çon dëm miliona tonë ushqime në vit; britanikët zënë vendin e parë

Një studim i kryer nga hulumtues të mbështetur nga Komisioni Europian ka dalë në përfundimin se qytetarët europianë çojnë dëm mbi 22 milionë tonë ushqime në vit, e në vend të parë gjenden britanikët.

Kërkuesit morën të dhëna nga gjashtë vende europiane për të arritur në konkluzionet e tyre, saktësisht nga Mbretëria e Bashkuar, Holanda, Danimarka, Finlanda, Gjermania dhe Rumania.

Studimi u publikua në periodikun Environmetal Research Letters, dhe u kufizua vetëm me të dhënat nga këto vende, pasi u çmuan si jo aq të besueshme informacionet për vendet e tjera.

Ndërsa britanikët zënë vendin e parë për çuarjen dëm të ushqimit, në vend të fundit renditen rumunët.

Pjesën më të madhe në ushqimet e çuara dëm e zënë perimet, frutat dhe drithërat, më së shumti për shkak të jetëgjatësisë së tyre të shkurtër.

Por dhe mishi zë vend mes artikujve që shkojnë dëm, bën të njohur studimi, dhe kjo ka ndikim të madh në burimet ujore dhe azotike.

Po sipas studimit, çuarja dëm e rreth 80 për qind të sasisë së lartpëmendur mund të shmanget. Hulumtuesit sugjeruan se edukimi i njerëzve për të psonisur në mënyrë më të kujdesshme dhe më të përmbajtur, si dhe për ta planifikuar konsumin e tyre, do ta pakësonte ndjeshëm sasinë e ushqimit të hedhur, duke ndikuar njëkohësisht në kufizimin e ndikimit të mbeturinave mbi mjedisin.  /tesheshi.com/