Rezultatet e zgjedhjeve europiane ndikuan më shumë tek shtetet anëtare të Bashkimit Evropian sesa vetë Parlamenti Evropian, vlerëson Euractiv në analizën e zgjedhjeve.
Në Francë, presidenti Emmanuel Macron bëri thirrje për zgjedhje të parakohshme pas suksesit të së djathtës ekstreme, e cila u gjykua si një “humbje që mund ta thyente”.
Në Berlin, rritja e papritur e AfD-së së ekstremit të djathtë, e cila zuri vendin e dytë, dhe fitorja e madhe e qendrës së djathtë CDU-CSU, tregojnë se qeveria e koalicionit e udhëhequr nga kancelari socialdemokrat Olaf Scholz është dobësuar ndjeshëm.
Në Madrid, presioni është në rritje ndaj partisë në pushtet PSOE, pasi qendra e djathtë PP fitoi zgjedhjet, gjë që forcoi më tej “peizazhin politik të brishtë”, sipas portalit të Brukselit.
Në Kopenhagë (Danimarkë), qeveria e koalicionit centrist humbi pothuajse 15 për qind brenda dy viteve nga zgjedhjet e fundit, ndërsa në Talin (Estoni), partia qeverisëse qendrore e Kaje Kallas është në gjendje krize sepse zuri vendin e tretë, por tani për tani atje nuk do të ketë zgjedhje të jashtëzakonshme.
Në Greqi, Demokracia e Re e qendrës së djathtë humbi 1.1 milionë vota në një vit dhe po shqyrton një riorganizim të qeverisë, ndërsa në Budapest, partia Fidesz e kryeministrit hungarez Viktor Orban arriti një rezultat më të dobët se më parë.
Siç u tha, bilancet e reja në Parlamentin Evropian tregojnë se një koalicion i qëndrueshëm pro-evropian është një skenar realist, pavarësisht rritjes së së djathtës ekstreme në të gjithë Evropën.
PPE e qendrës së djathtë, socialistët e BE-së dhe liberali Renew Europe mund të formojnë një shumicë prej 403 vendesh dhe rezultatet rrisin mundësinë që kandidatja e PPE-së, Ursula von der Leyen, të rizgjedhet në krye të Komisionit Evropian.
Drejtori menaxhues i Forefront Advisers, Christopher Glück, tha se shumica e treshes qendrore duken mjaft solide dhe ka të ngjarë të ketë më shumë se 410 vende.
Ai vlerësoi se Von der Leyen nuk ka më nevojë për mbështetjen e Giorgia Melonit apo të ECR-së për t’u rizgjedhur në krye të KE-së dhe se negociatat mes PPE-së, socialdemokratëve dhe “Rinew Europe” tani do të jenë “të thjeshta”.
Për më tepër, socialistët thanë se nuk do të mbështesnin Von der Leyen nëse do të kishte ndonjë bashkëpunim me ECR ose Meloni, përfundoi Euractiv. /tesheshi.com/
