Ministrja e Drejtësisë, Etilda Gjonaj, shprehet se emërimin në këtë detyrë e ka marrë vesh ditën që kryeministri Edi Rama paraqiti para Asamblesë së PS-së kabinetin e ri qeveritar.
Gjonaj tha se nuk ka qenë në dijeni të vendimit të kryeministrit.
“Gjatë këtyre 4 muajve të fundit kanë qënë zv.ministre e Drejtësisë. Propozimin e kam marrë vesh sikurse shumica e qytetarëve që janë informuar nga televizoni. Edhe për mua ishte surprisë edhe pse deri në atë kohë mbaja detyrën e zv. ministres”, shprehet Gjonaj në një intervistë televizive.
Ndërsa vlerëson vendimin e qeverisë për lehtësimin e proçedurave buroktarike përsa i përket dokumenteve që kërkohen nga zyrat e shtetit, Gjonaj tha se pas çertifikatave po punohet që edhe dëshmitë e penalitetit të sigurohen nga institucionet, ose kur kërkohen nga privati koha për marrjen e tyre të reduktohet në më pak se 3 javë.
Ndërkohë në lidhje me zbatimin e vettingut, ajo shprehet se do të ishte mirë që KLD të kishte kryer më shpejt detyrat e saj.
“Si të gjithë aktorët në reformën në drejtësi kanë përgjegjësitë e tyre për të zbatuar ligjin për të çuar më tej këtë reformë edhe Këshilli i Lartë i Drejtësisë dhe Inspektoriati i Lartë i Drejtësisë kanë patur detyra të përcaktuara në kuadër të procesit të Vettingut.
Do të ishte e mirë që këto institucione ti kishin kryer më parë të gjitha veprimet dhe të kishin marrë masat konkrete në mënyrë që procesi të kishte filluar dhe tashmë së bashku me organet e vettingut të zhvilloheshin hapat e parë.
Dje Këshilli i Lartë i Drejtësisë bëri një hap pozitiv duke marrë masat për procesin paraprak për vlerësimin profesional të gjyqtarëve duke vendosur urat e bashkëpunimit së bashku me organet e Vettingut por janë masa që duhet të ishin marrë më parë”, shprehet ajo. /tesheshi.com/
