Ditë më parë, bota artistike mbarëshqiptare, posaçërisht ajo kinematografike, pësoi një shock për mirë, kur filmi kosovar “Shok” u përzgjodh për në Oscar – e para herë kjo – ku do të konkurojë në kategorinë e filmit më të mirë të shkurtër, Live Action Short Film. Filmi “Shok” është një bashkëprodhim Kosovë-Angli, me skenar dhe regji të Jamie Donoughue.
Ai është i bazuar në ngjarje të vërtetë, të ndodhur gjatë periudhës së luftës në Kosovë, kur vendi ishte nën okupimin e Serbisë. Këtu sprovohen kufijtë e miqësisë mes dy djemve të vegjël, të cilët luftojnë për të mbijetuar gjatë luftës në Kosovë.
Eshref Durmishi, producent i tij, rrëfen shkurt për tesheshi.com përjetimet e tij të këtyre ditëve që kanë pasuar lajmin e madh, duke mos ngurruar ta krahasojë atë me Pavarësinë e Kosovës si ngjarje madhore mbarëkombëtare…
Intervistoi: Shkëlzen Rrecaj
“Shok” në Oskar. Për ne si shoqëri nuk është thjesht një film, një produkt ngushtësisht artistik, pasi bëhet fjalë për vetë Kosovën në një kompeticion kaq me famë si Oskar-i, apo jo?
Po! Dhe ndjehem jashtëzakonisht mirë, sepse po hyjmë në historinë e kinematografisë shqiptare me këtë film, Po hapim një faqe të re të saj. Po ashtu më ngazëllen fakti se gjithë shqiptarët janë gëzuar për këtë sukses të madh. Bashkëkombasit të cilët i takoj gjithandej, nuk e fshehin gëzimin për këtë sukses. Ata më thonë se vetëm për pavarësinë e Kosovës janë gëzuar aq shumë. Dhe personalisht, besoj se që nga Pavarësia e Kosovës kjo është ngjarja më e madhe që ka ndodhur në këtë vend.
E prisnit ju personalisht nominimin apo ju erdhi si shock?
Të them të drejtën në fillim nuk kemi pritur që filmi të shkonte aq larg, por kur filloi rrugëtimin, atëherë shpresat dhe gjasat rriteshin për ditë e më shumë. Kështu që pasi u futëm në listën e ngushtë mes dhjetë filmave, atëherë fillova të besoj se do të nominoheshim. Atë ditë mu përzien ndjenjat dhe isha në ankth të madh deri sa dëgjova emrin e filmit “Shok”, gjë që më bëri të fluturoja nga gëzimi.
Si u ngjiz “Shok”-u?
Skenaristi edhe regjisori i filmit, Jamie Donoghue ka qëndruar në Kosovë për një kohë të gjatë edhe ka dëgjuar shumë rrëfime për luftën dhe gjenocidin që ka ndodhur në Kosovë. Dhe dihet që lufta, ajo histori e trishtë dhe e jashtëzakoshme, bart dhe subjekte e përvoja njerëzore mjaft tërheqëse. Ai edhe nga vetë unë, kemi dëgjuar shumë të tilla, dhe një nga ato u zgjodh si temë për film.
Kush lëvizi i pari drejt realizimit, ju apo ekipi anglez?
Regjisori erdhi me skenarin dhe më tha se dua ta realizojmë këtë temë së bashku. Kështu, u mblodh ekipi dhe nisëm realizimin. Kam punuar shumë për këtë film, sepse kam dashur që rrëfimet tona t’i shohë e tërë bota.
A i keni parë filmat me të cilët konkurroni dhe çfarë gjasa ka “Shok” për ta fituar Oskari-n në këtë kategori?
Filmave konkurrentë u kam parë vetëm trailerat, por sipas mediave ndërkombëtare jemi favorit për të fituar. Dhe besoj se mund të fitojmë.
A ju ka motivuar kjo arritje që të merrni përsipër ndonjë projekt tjetër serioz?
Patjetër që tashmë motivimi është më i madh. Ky film na e ka hapur rrugën për projekte të tjera serioze.
A mund të pritet një bashkëpunim mbarëkombëtar, përfshirë këtu aktorë shqiptarë që kanë bërë emër në skenën botërore?
Patjetër se do te kisha dëshirë që t’i mblidhja me një film të gjithë artistët që kanë bërë famë ndërkombëtare që të jemi edhe më të fuqishëm.
U shpërblyet ose jo, ju tashmë keni hyrë në historinë e artit të Kosovës. Cili është mesazhi i juaj?
Punë, punë dhe vetëm punë. Mos u ndalni së punuari, sepse vërtet me një shans të mirë ëndrrat gjithnjë bëhen realitet, por vërtetë duhet shumë mund, sakrificë dhe punë e madhe.
Urime të gjithë shqiptarëve kudo që janë edhe faleminderit për përkrahjen!
/tesheshi.com/
