Erzen Rrustemi është historia e radhës së suksesit të sportistëve shqiptarë në arenën ndërkombëtare. Histori kjo për të cilën Erzeni ka vendosur të tregojë ekskluzivisht për portalin tonë, tesheshi.com. Fitorja e tij në duelin e fundit ndaj rivalit serb Aleksandër Todoroviç i ka bërë krenarë shumë shqiptarë, që pas disfatës në futboll përjetuan një ngadhënjim në boks. Por duhet të presim dhe pak për të parë nga afër ndonjë ndeshje të Erzenit në tokat shqiptare, gjersa përkrahja shtetërore të jetë e mjaftueshme për të organizuar diçka të tillë.
Një njohje e shkurtër se kush është Erzen Rrustemi
Erzen Rrustemi ka lindur më 7 tetor të 1983-shit në fshatin Zhegër të Komunës së Gjilanit. Vjen nga një familje me tradita atdhetare, e, për më tepër, është nipi i shkrimtarit të njohur Sabit Rrustemi.
Karrierën në boksin profesionist e filloi më 7 prill të viti 2012, dhe deri tani ka zhvilluar dhjetë ndeshje, të cilat i ka mbyllur të gjitha me fitore. Edhe pse në dukje mund të mendojmë se Erzeni paska një karrierë të shkurtër, mjafton që ajo të jetë në rrugën e duhur, e mbuluar me plot suksese dhe pasion, për të regjistruar të tjera me radhë, që janë në pritje.
Pas suksesit të pak ditëve më parë, i kërkojmë Erzenit një intervistë të shkurtër, dhe ai tregohet i gatshëm të na përgjigjet.
Erzen, së pari ju urojmë për fitoren e madhe të datës 24 tetor. Fitorja e dhjetë me radhë në karrierë, ndaj një rivali serb. E bën kjo edhe më të veçantë atë?
Po, normale. Megjithëse është me rëndësi së pari të vazhdoj me formën e mirë, të 
ngrihem sa më lart në renditjen e përgjithshme, në mënyrë që të kem mundësi të përballem me boksierë të një niveli më të lartë.
Para se të filloni boksin profesionist keni deklaruar se nëse humbni në dhjetë ndeshjet e para, atëherë do ndaloni së boksuari. Pas dhjetë ndeshjeve keni dhjetë fitore. A do të thotë kjo se tani Erzeni pretendon që një ditë të shpallet edhe kampion bote?
Eshtë e vërtetë se kam thënë ashtu. Por ajo ka qenë deklaratë e momentit, dhe jo shumë me vend. Boksi është një sport si shumë sporte të tjera, prandaj ju mund të humbisni apo të fitoni, dhe është krejt normale. Tani mendoj ndryshe, edhe pse pretendimi për kampion bote është pak si shumë për momentin. Duhet të përqendrohem në punë dhe të arrij fillimisht rezultate, pastaj shohim.
Në këto duele kemi parë që ca prej tyre i keni zhvilluar ndaj boksierëve ballkanas. A është më i vështirë rregullimi i dueleve me boksierë të vendeve perëndimore?
Jo, kjo nuk ka të bëjë me nacionalitetin prej nga vijnë ata. Madje, unë as që e kam ditur se nga vijnë, por vetëm kam parë ku janë formuar dhe ku e kanë zhvilluar karrierën. Nuk është e thënë që patjetër të ndeshem me boksierë të vendeve perëndimore. Për shembull, Zvicra nuk ka boksierë të njohur e të ngritur në ranklistë, ndaj nuk mund të ndeshem me ta.
Ç’do të thotë të organizosh një ndeshje, kur bëhet fjalë për përgatitjet, marketingun, e për gjëra të tjera që e bëjnë sfidën të duket sa më madhështore?
Eshtë shumë e vështirë. Organizimi i ndeshjeve ka një kosto të lartë financiare. Në ndeshjet e fundit më ka ndihmuar klubi i boksit “Boxing” nga Hamburgu i Gjermanisë, klubi në të cilën ndodhet dhe miku im, Nuri Seferi. Gjërat kanë shkuar shumë mirë, dhe do shohim shumë shpejt edhe për organizimin e një ndeshje tjetër të nivelit të tillë.
Ndeshjen e fundit e keni zhvilluar në Hamburg të Gjermanisë. Ndërkohë që ju kanë ndjekur mijëra shqiptarë përmes ekraneve, a do organizoni në të ardhmen ndonjë përballje boksi në Kosovë, apo edhe në Shqipëri?
Kostoja e lartë financiare e një dueli e bën të pamundur për momentin këtë gjë. Kam patur premtime nga Komuna e Gjilanit dhe ajo e Vitisë se do ndihmojnë në financimin dhe organizimin e një ndeshjeje të tillë, por deri më tani nuk ka patur asgjë konkrete. Në të ardhmen nuk i dihet. Ndoshta mund të zhvilloj një ndeshje në vendin tim, pasi vullneti nuk mungon aspak.
Cili është modeli që merr si shembull Erzeni, cili boksier?
Çdo boksier merr si shembull një boksier tjetër, apo ka një model se si duhet boksuar. Meqenëse unë kam gjatësinë e duhur, më shumë preferoj stilin e boksierëve rusë, duke luftuar nga distanca. Mundohem të shfrytëzoj gjatësinë time për të goditur kundërshtarin, prandaj ky stil më është përshtatur si duhet.
Cilat janë synimet e Erzenit në vijim, ndonjë ndeshje tjetër?
Deri në fund të këtij viti do të kemi sigurisht edhe një ndeshje tjetër. Ende nuk ka ndonjë datë konkrete, por mund t’u siguroj se do të zhvilloj edhe një tjetër. Kundërshtarin ende nuk e kemi përcaktuar, pasi po shohim mundësinë se kush mund të jetë rivali im në ring.
Intervistoi: Drilon Sylejmani – /tesheshi.com/
