Iraku prej ditësh i bën presion Turqisë t’i largojë trupat ushtarake nga kampi në Bashika, duke e çuar çështjen gjer në OKB. Veç kësaj, kryeministri irakian, Hajdar el-Abadi, ka deklaruar se trupat turke nuk do të lejohen të marrin pjesë në operacionin për çlirimin e Mosulit.
Pas reagimeve të ndryshme nga autoritetet turke, sot është shprehur mbi këtë çështje dhe presidenti Erdogan.
Në takimin e nëntë të Këshillit Islam Euroaziatik, Erdogan e ka bërë të qartë se trupat turke do t’i bashkohen operacionit për largimin e ISIS-it nga Mosuli.
Ai ka thënë se qeveria irakiane e ka kërkuar vetë praninë e trupave ushtarake në Irak. Sipas tij, vetë el-Abadi ka kërkuar ngritjen e një baze ushtarake në Bashika gjatë kohës që kryeministër ka qenë Davutogllu.
“Kemi regjistrime të drejtpërdrejta të të gjithë atyre, dhe do t’i transmetojmë në televizion sot apo nesër,” ka bërë të ditur Erdogani.
“Tani ai [el-Abadi] thotë, ‘largohuni nga këtu’. Ushtria e Republikës së Turqisë nuk e ka humbur pozitën sa të marrë udhëzime nga ju. Ju nuk jeni bashkëbiseduesi im. Ju nuk jeni në nivelin tim.”
Nuk është fare e rëndësishme si bërtisni ju nga Iraku. Duhet ta dini se do të bëjmë çfarë të duam.”
“Kush është ky? Kryeministri i Irakut. Së pari mbaj vendin tënd!”, ka qenë përgjigjja e Erdoganit ndaj Hajdar el-Abadit. /tesheshi.com/
