Presidenti turk Erdogan zhvilloi bisedën e parë telefonike me kryeministren suedeze Magdalena Anderson që nga fillimi i krizës së hapur mes dy vendeve, si dhe me Finlandën, lidhur me anëtarësimin e tyre në Aleancën Atlantike.
Në një deklaratë të lëshuar pas bisedës, thuhet se presidenti turk tha se ai “pret që Suedia të marrë masa konkrete dhe serioze, duke treguar se ndan shqetësimet e Turqisë për organizatën terroriste PKK (Partia e Punëtorëve të Kurdistanit) dhe degët e saj në Siri dhe Irak”.
Sipas agjencisë shtetërore të lajmeve Anadolu, presidenti turk i tha gjithashtu kryeministres suedez se embargoja e armëve e vendosur ndaj Turqisë në vitin 2019 pas operacioneve turke në Siri në tetor 2019, duhet të hiqet.
Sipas agjencisë franceze, komunikimi telefonik mes të dyve nuk ishte i planifikuar.
Finlanda dhe Suedia aplikuan për anëtarësim në NATO të mërkurën pas pushtimit rus të Ukrainës më 24 shkurt.
Turqia i befasoi aleatët e NATO-s javën e kaluar duke ngritur kundërshtime për pranimin e dy vendeve, por udhëheqësit perëndimorë kanë shprehur besimin se kundërshtimet e Ankarasë nuk do të pengojnë procesin e pranimit të tyre.
Ankaraja thotë se Suedia dhe Finlanda po sponsorizojnë individë të lidhur me Partinë e Punëtorëve të Kurdistanit (PKK), si dhe mbështetës të Fethullah Gulen-it, të cilin Turqia e akuzon për grusht-shtetin e dështuar të vitit 2016.
Njëkohësisht, Erdogan pati sot bisedime “të hapura dhe të drejtpërdrejta” me presidentin finlandez Sauli Niinisto, siç deklaroi ky i fundit, për çështjen e kërkesës së Helsinkit për anëtarësim në NATO.
Pas bisedës së tyre telefonike, Niinisto postoi në Tëitter: “E informova se si aleatë të NATO-s, Finlanda dhe Turqia do të angazhohen për sigurinë e njëra-tjetrës dhe kështu marrëdhëniet tona do të forcohen. Finlanda dënon terrorizmin në të gjitha format dhe manifestimet e tij. Dialogu i ngushtë vazhdon”. /tesheshi.com/
