Presidenti i Turqisë, Reçep Tayyp Erdogan ka deklaruar se nëse nuk mbyllet shpejt formimi i qeverisë së koalicionit ai do të shpallë zgjedhjet e parakohshme.
Presidenti Reçep Tayyp Erdogan në një fjalim që mbajti në sesionin e 22-të të mbledhjes së Asamblesë së Eksportuesve të Turqisë tha se me rritjen e eksporteve, turizmit dhe prodhimit Turqia ka shfaqur shumë herë performanca mbi parashikimet.
Erdogan më tej ka pohuar se: “Një zhvillim të tillë, një surprizë të ngjashme shpresoj që ta përjetojmë sërish në muajt e ardhshëm edhe në vendin tonë, edhe ndaj të gjithë botës. Në këtë çështje unë iu besoj eksportuesve tanë”.
Duke vënë në dukje se mes stabilitetit politik dhe niveleve të rritjes në Turqi ka një marrëdhënie të fortë Erdogan u shpreh se “Cili lider apo politikan që ka arritur të marrë mbështetjen më të fortë nga populli në vendin tonë, në periudhën e atij Turqia ka arritur normat më të larta dhe të qëndrueshme të rritjes”.
Pasi ka theksuar se Turqia jo vetëm që nuk duhet të shënojë rënie, por as të ndalohet ritmi i rritjes, Erdogan u shpreh ndër të tjera se: “Turqia, e cila ndodhet në mes të një rrethi zjarri, duhet të jetë e fortë në mënyrë që të mos dëmtohet vetë nga kjo, por edhe të zgjasë dorën e ndihmës për vëllezërit e saj. Dhe për këtë duhet të përfundojë sa më shpejt periudhën kalimtare, sepse jemi të detyruar të rikthejmë drejtimin e Turqisë drejt të ardhmes. Koha 45 ditore që kushtetuta i njeh presidentit për të vendosur ripërtëritjen e zgjedhjeve në rast se nuk do të mund të krijohet qeveria fillon me Zgjedhjen e Kryesisë së Kuvendit. Në një rast të tillë bëhet fjalë për një proces, i cili zgjatet deri në mesin e gushtit. Unë besoj se Turqia nuk mund të tolerojë një humbje kohe të tillë. Për këtë uroj që qeveria e koalicionit të formohet në një kohë sa më të shpejt”.
Erdogan ndër të tjera ka theksuar se në procesin e formimit të qeverisë asnjë parti politike nuk duhet të mbetet rob i egos së kryetarit të saj.
Ai ka tërhequr vëmendjen se nëse mbisundon egoja, atëherë do të zgjatet procesi i formimit të qeverisë dhe tha se: “Atëherë me detyrën që na është ngarkuar si president, nëse politikanët nuk e zgjidhin këtë punë atëherë populli është autoriteti i vetëm që do ta zgjidhë këtë çështje. Këtë jemi të detyruar ta bëjmë”.
Erdogan duke u bërë thirrje liderëve të partive që të veprojnë me vetëdije dhe me ndjenjën e përgjegjësisë u shpreh se: “Detyra që kanë partitë tona dhe kryetarët e tyre është që të veprojnë me vetëdijen e përgjegjësive që kanë pa e vështirësuar durimin e vendit, të popullit dhe veçanërisht të ekonomisë. Turqia me një gjuhë të përbashkët, me qëllime të përbashkëta dhe me një koalicion të formuar në kuadër të një bonsensi të përbashkët mund të riforcojë klimën e besimit dhe të stabilitetit”.
Erdogan, më tej ka pohuar se “askush nuk ka të drejtë të përdorë pozicionin e tij për të bllokuar sistemin. Të gjitha partitë dhe politikanët që ndërmarrin një proces të tillë duhet ta dinë se kanë përgjegjësitë e tyre për këtë dhe do të japin llogari përpara popullit. Është faj i rëndë që të vendosësh Turqinë në situatën e një vendi, i cili nuk mund të krijohet qeveria”.
Presidenti turk më tej në lidhje me disa kritika ndaj tij u shpreh se: “Ta shpreh edhe këtë. Del njëri e shprehet fjalë të tilla si ‘Presidenti të tërhiqet në pozicionin e tij kushtetues’. Unë e di shumë mirë vendin tim në kushtetutë. Kam kaluar 40 vjet të jetës sime duke vepruar sipas kushtetutës dhe në çdo post që kam qenë, kam kaluar në zbatimin e saj si pasojë e angazhimeve. Edhe tani e di shumë mirë detyrën që më jep kushtetuta si president, autoritetin si dhe e di shumë mirë përdorimin e kësaj. Dhe për këtë nuk kam nevojë për udhëzimet e ndonjërit”. /tesheshi.com/
