Presidenti turk, Recep Tayyip Erdogan, paralajmëroi se do të shpallë zgjedhjet e parakohshme nëse në bisedimet mes AK Parti dhe republikanëve të CHP-së do të japin rezultat negative apo do të ketë shantazh.
Madje Erdogan ka paralajmëruar kurdët e HDP-së se kanë zhvilluar një fushatë elektorale duke përdorur shantazhin dhe kërcënimin terrorist.
Presidenti turk, i tha këto gjatë një konference për shtyp që zhvilloi në avionin presidencial, ndërsa po udhëtonte nga Kina për në Indonezi, vendin me numrin më të madh të besimtarëve myslimanë.
Erdogan gjithashtu deklaroi se është kundër një qeverie të përhershme të pakicave.
Ndër të tjera, kreu i shtetit turk tha se jetëgjatësia e një qeverie të koalicionit në Turqi ka qenë përgjithësisht 3 vjet e gjysmë.
“Në qoftë se nga bisedimet për formimin e qeverisë së koalicionit del ndonjë rezultat pozitiv atëherë gjithçka është në rregull, nëse jo atëherë do të ishte mirë që thërrasim vullnetin kombëtar që populli të vendosë sërish dhe të dalim sa më shpejt nga kjo situatë”, u shpreh Erdogan.
Në lidhje me sulmet terroriste dhe ndikimit të tij në politikë, Presidenti i Turqisë, tha se “Fatkeqësisht ka pasur forca politike që kanë keqpërdorur procesin e zgjidhjeve të problemit të terrorit në vend, kemi paguar një çmim të rëndë në zgjedhjet e fundit. Pretendimet se në kutitë e votimit nuk kishte kërcënime dhe nuk ka pasur probleme nuk janë të vërteta”.
Erdogan ndau me gazetarët edhe detajet e takimit me përfaqësuesit e komunitetit myslimanë të Kinës ku tha se “është informuar se janë të qetë për nga aspekti i kryerjes së riteve fetare”.
Erdogan tha se gjatë takimeve në rend të ditës ka qenë edhe Rajoni Autonom Ujgur i Sinkiangut ndërsa shtoi se “Ne jemi kundër çdo lëvizjeje që si objektiv merr unitetin dhe solidaritetin e Republikës Popullore të Kinës dhe në këtë mënyrë e bëmë të ditur se nuk kemi mendim të ndryshëm nga RP e Kinës në lidhje me këtë çështje”.
/tesheshi.com/
