Presidenti turk Rexhep Tajip Erdogan tha të hënën se Turqia mund të bllokojë tubacionin e naftës nga Iraku i Veriut në tregun botëror.
Erdogan me këtë ka shtuar presionin mbi rajonin kurd në Irak, ku sot po zhvillohet një referendum për pavarësi.
“Pas kësaj, le të shohim se përmes cilit kanal autoritetet rajonale në Irakun e veriut do të dërgojnë naftën dhe ku do ta shesin atë,” tha Erdogan në një fjalim në forumin e Stambollit.
Ai shtoi se Ankaraja “kontrollon rubinetin”.
“Momentin kur të mbyllim rubinetin, çdo gjë do të mbarojë,” tha presidenti turk.
Erdogan, megjithatë, nuk tha nëse Turqia kishte vendosur të bllokonte tubacionin.
Qindra mijëra fuçi naftë çdo ditë transportohen nga një tubacion nafte që shkon nga pjesa veriore e Irakut në Turqi. /tesheshi.com/
