Presidenti turk, Recep Tayyip Erdogan, u tha udhëheqësve rusë dhe francezë të dielën se ishte arritur një “pikë kthese historike” në përpjekjet për t’i dhënë fund luftës midis Rusisë dhe Ukrainës dhe se Ankaraja ishte gati të priste bisedime midis dy palëve, tha zyra e tij, raportoi AFP.
Turqia, anëtare e NATO-s, është përpjekur të ruajë marrëdhënie të mira me të dy fqinjët e saj konfliktuoze në Detin e Zi që nga fillimi i pushtimit rus dhe ka organizuar dy herë bisedime që synojnë përfundimin e luftës.
Presidenti ukrainas Volodymyr Zelensky tha të dielën se pret që Moska të angazhohet për një armëpushim 30-ditor, duke shtuar se Kievi është “gati” të takohet me Rusinë për bisedime të drejtpërdrejta mbi një armëpushim nëse kjo ndodh.
Një mundësi për paqe
Komentet e tij erdhën pasi presidenti rus Vladimir Putin propozoi bisedime të drejtpërdrejta më 15 maj në Stamboll, por nuk u ndal te armëpushimi 30-ditor i propozuar.
Erdogan përshëndeti deklaratën e udhëheqësit rus se bisedimet e paqes duhet të vazhdojnë në Stamboll aty ku u ndërprenë, në një bisedë telefonike me Putinin të dielën, tha zyra e udhëheqësit turk.
Agjencia AFP raporton, duke cituar një deklaratë nga zyra presidenciale turke, se ai i tha Putinit se “Turqia është e gatshme të presë negociata që synojnë arritjen e një zgjidhjeje të qëndrueshme”.
Erdogan tha gjithashtu se “është hapur një shans për arritjen e paqes dhe se arritja e një armëpushimi gjithëpërfshirës do të krijonte mjedisin e nevojshëm për negociatat e paqes”.
Presioni nga katër vende evropiane
Udhëheqësi turk foli gjithashtu me presidentin francez Emmanuel Macron, i cili vizitoi Kievin të shtunën me udhëheqësit e Gjermanisë, Britanisë së Madhe dhe Polonisë.
Udhëheqësit e katër vendeve evropiane po i bëjnë presion Rusisë – me mbështetjen e Presidentit të SHBA-së Donald Trump – që të angazhohet për një armëpushim pa kushte në Ukrainë duke filluar nga e hëna.
Në një telefonatë, Erdogan i tha Macron se “është arritur një pikë kthese historike në përpjekjet për t’i dhënë fund luftës midis Ukrainës dhe Rusisë, se kjo mundësi duhet të shfrytëzohet dhe se Turqia është e gatshme të ofrojë çdo lloj mbështetjeje, përfshirë edhe pritjen e negociatave, me qëllim arritjen e një armëpushimi dhe paqeje të qëndrueshme”, tha Presidenca turke.
Reuters kujton se Turqia priti bisedime midis Rusisë dhe Ukrainës në mars të vitit 2022.
Draft-marrëveshja që ishte në diskutim në atë kohë do ta detyronte Ukrainën të hiqte dorë nga ambiciet e saj për në NATO dhe të pranonte statusin e përhershëm të një vendi neutral dhe pa armë bërthamore në këmbim të garancive të sigurisë nga SHBA-ja, Rusia, Kina, Mbretëria e Bashkuar dhe Franca – pesë anëtarët e përhershëm të Këshillit të Sigurimit të OKB-së. /tesheshi.com/
