“Standartet e dyfishta”, ishte një ndër pikat e cekura në fjalimin e presidentit turk Rexhep Tajjip Erdogan në samitin e G20-ës në Hamburg. I ndodhur si për ironin në vendin me udhëheqjen e së cilit ka fërkime, mospajtime dhe përplasje të herëpahershme, e që po ashtu e akuzon për “standarte të dyfishta”, Erdogan tha se samiti duhet të përcjellë një tjetër frymë nga ajo që karakterizon deri më tani raportet ndërkombëtare, sidomos kur është fjala për sfidën e madhe të kërcënimit terrorist.
“Dëshiroj që ky samit të jetë një pikë kthese mbi bazën në të cilën do të pranojmë se të gjithë jemi të kërcënuar nga terrorizmi, pa dallim feje, gjuhe apo race…”
“Nuk do të shënojmë përparim në luftën kundër organizatave terroriste derisa mos t’i kemi braktisur standardet e dyfishta dhe të vendosim për bashkëpunim dhe solidaritet”, bëri thirrje Erdogan.
Nga ana tjetër ai mbrojti Katarin nga akuzat që i bëhen si dhe u kujtoi pjesëmarrësve grushtin e dështuar të shtetit një vit më parë.
“Militantët e organizatës terroriste të cilët më 15 korrik të vitit të kaluar tentuan të kryejnë puçin e përgjakshëm dhe vranë 250 njerëz dhe plagosën 2.193 të tjerë, vendet nga Perëndimi i shohin si strehimore të sigurtë. Dëshiroj të theksoj se situata e tillë i shqetëson qytetarët tanë të cilët më 15 korrik me çmimin e jetës së tyre u ngritën dhe e mbrojtën demokracinë”, theksoi presideti turk. /tesheshi.com/
