Presidenti turk Rexhep Tajip Erdogan, tha se mbrojtja e statusit ligjor të Jerusalemit është një detyrë jo vetëm e muslimanëve, por e gjithë njerëzimit.
Në prag të vizitës së tij zyrtare në Greqi, duke iu drejtua masës së mbledhur në aeroportin Esenbog në Ankara, Erdogan tha se do të vazhdojë bisedimet me udhëheqësit nga e gjithë bota lidhur me vendimin e Presidentit Trump për të njohur Jerusalemin si kryeqytetin e Izraelit.
“Po vazhdoj me bisedat telefonike. Nuk bëhet fjalë vetë për bisedat me krerët e vendeve islamike. Madje kam kërkuar një bisedë edhe me Papën, me të cilin do të flasim sonte ose nesër në mëngjes, sepse bëhet fjalë gjithashtu për një vend të rëndësishëm edhe për të krishterët. Do të flas edhe me presindetin Putin dhe me udhëheqësit e Gjermanisë, Britanisë së Madhe, Francës dhe Spanjës, sepse kjo nuk është më vetëm një detyrë e një muslimani, por një detyrë e njerëzimit”, tha Erdogan.
Presidenti Erdogan porositi më herët homologun Trump, se me veprimin të cilin po e ndërmerr, ai po e shtyen rajonin e Lindjes së Mesme drejt zjarrit.
“Udhëheqësit politikë nuk janë këtu për të bërë këtë, por për të vendosur paqe”, tha Erdogan.
Presidenti turk tha gjithashtu se me një hap të tillë Trump po e shtyn rajonin në zjarr dhe pyeti se cili ishte qëllimi apo plani i presidentit amerikan.
“Nëse Trump mendon se po e bën këtë, pikërisht për shkak se ai është i fuqishëm, atëherë ai po gabon. Të qenit i fuqishëm nuk do të thotë të kesh të drejtë. Të fuqishëm janë ata që kanë të drejtë. Ai duhet ta dijë këtë”, tha Erdogan. /tesheshi.com/
