Një operacion intensiv ka nisur nga dy agjenci ligjzbatuese në vend, në kuadër të vettingut të gjyqtarëve dhe prokurorëve.
Siç mësohet, Departamenti i Pastrimit të Parave në Kryeministri dhe Inspektorati i Lartë i Kontrollit të Pasurive dhe Konfliktit të Interesave, kanë nisur një punë konkrete verifikuese të të gjitha pasurive të patundshme të gjyqtarëve, prokurorëve, drejtuesve të institucioneve të drejtësisë që janë subjekt i ligjit të vettingut.
ILDKP nga ana e tij, i ka dërguar një listë të gjatë Departamentit të Pastrimit të Parave, me pronat që dyshohen se janë në zotërim të disa gjyqtarëve e prokurorëve, por që janë regjistruar me emra të tjerë, kryesisht familjarësh jo të afërt dhe miqsh.
Ndërkaq, një verifikim i thellë po kryhet edhe me pasuritë e lujtshme që janë kryesisht llogaritë bankare.
ILDKP ka akses në llogaritë bankare, por DPPPP ka ekspertë që arrijnë të evidentojnë kur këto transferta janë të dyshimta dhe kur ka pastrim parash.
ILDKP mësohet se ka gjetur disa raste me llogari bankare jashtë vendit, apo transferta të kryera prej tyre dhe për këtë arsye Drejtoria e Pastrimit të Parave do bëjë një verifikim akoma dhe më të thelluar.
ILDKP po bën një ballafaqim edhe me deklaratat e mëparshme dhe nëse nuk ka përputhje, atëherë thellohen hetimet.
Siç bëhet e ditur, Departamenti i Pastrimit të Parave ka hartuar një raport me rastet e dyshimta ku mospërputhen deklarimet që kanë bërë në vitin 2015, ku kanë deklaruar dhe llogari jashtë vendit, mirëpo në 2016 nuk e kanë bërë një gjë të tillë. Në këtë mënyrë, automatikisht nisin verifikimet edhe jashtë vendit nëse janë mbyllur apo jo këto llogari.
Në fokus do jenë krerët e institucioneve, por dhe ata persona që janë kallëzuar më parë nga ILDKP.
Në shtator, Komisioni i Kualifikimit apo Komisioni i Vettingut siç quhet ndryshe, do të marrë në sitë të gjithë gjyqtarët prokurorëte.
Sapo të konstituohet, ILDKP do i dorëzojë Komisionit një raport me të dhënat për çdo gjyqtar, bashkë me informacionet që do sjellin hipoteka dhe Drejtoria e Pastrimi të Parave, dhe më pas vetë komisioni mund të kryejë verifikime të tjera. Nga ana tjetër, këto materiale do të jenë në dorë dhe të Operacionit Ndërkombëtar të Monitorimit.
Ky grup ekspertësh do të bashkëpunojë me FBI dhe me Interpolin në mënyrë që të verifikohen të gjithë emrat. ONM pritet që të verifikojë jashtë vendit të gjithë ata gjyqtarë dhe prokurorë, të cilët kanë deklaruar llogari bankare jashtë vendit, apo që kanë udhëtuar po jashtë. Për të gjithë do angazhohet Interpoli, i cili do kryejë kontrolle të imtësishme. Rruga që do ndiqet do jetë e njëjtë me atë të kandidatëve për organet e vetingut, pasi ONM i verifikoi për 2 javë 194 vetë, duke kontrolluar brenda dhe jashtë vendit.
Siç mësohet, ekzistojnë dyshime se subjekte që i kanë nxjerrë paratë jashtë vendit, ose kanë shitur prona. Për këtë arsye, gjatë këtyre ditëve do të verifikohet çdo lloj transferte e tyre, ndërsa më pas do jetë ONM që do japë vulën përfundimtare nëse vërtet gjyqtarët kanë nxjerrë apo jo para jashtë vendit.
Nëse kjo është bërë në mënyrë të jashtëligjshme, ata ikin nga sistemi. /tesheshi.com/
