Vizita e Presidentit Ilir Meta në Medvegjë ka marrë një vëmendje shumë të madhe të mediave serbe dhe atyre ruse, madje ia ka kaluar hapësirës që iu dha vizitës së ish-presidentit Bujar Nishani, një vit më parë. Janë dy elementë që bien në sy tek kjo vizitë, e cila është jo zyrtare.
E para është publiciteti i madh që po i bëhet një vizite jo zyrtare dhe bojkotimi nga ana e autoriteteve politike shqiptare të Luginës së Preshevës.
Nga ambasada jonë në Beograd dhe nga Presidenca nuk japin asnjë koment për këtë mungesë, por bie në sy që një media mjaft pranë presidencës siç është “Presheva Jonë” e ka shpallur Ilir Metën si “njeriun e vitit”.
Vitin e shkuar, pikërisht në këtë periudhë, Maliqi rregulloi një vizitë zyrtare në Preshevë të presidentit të atëhershëm Bujar Nishani.
Kreu i atëhershëm i shtetit, zhvilloi takime zyrtare në Preshevë ku u takua me të gjithë politikanët tanë atje dhe çdo gjë u koordinua nga ambasada shqiptare në Beograd.
Nishani, shkoi gjithashtu edhe në Bujanoc që është komuna me numrin më të madh të shqiptarëve në Luginë.
Edhe Edi Rama në vitin 2014 që theu edhe akullin e vizitave të krerëve të lartë në Preshevë, zhvilloi një axhendë të ngjashme me atë të Nishanit vitin e kaluar.
Ndërsa presidenti aktual i Republikës, Ilir Meta, zhvilloi një vizitë jo zyrtare në Luginë, megjithë takimet mjaft interesante dhe të rëndësishme.
Kreu i Shtetit ka vizituar Medvegjën dhe fshatrat e saj, që është një komunë ku shqiptarët po asimilohen vazhdimisht dhe numri i tyre nuk është më shumicë.
Meta, si edhe në Manastir është pritur me shumë entuziazëm nga bashkëatdhetarët, që i kanë kënduar me çifteli këngën e “Hajredin Pashës” si për t’i bërë qejfin se është dhëndër Dibre.
Shqiptarët e Medvegjës, si edhe ata të Manastirit, janë të etur për të parë një figurë të shtetit shqiptar, pasi kanë qenë të harruar, por edhe të braktisur.
Nisur nga ky fakt, vizita e Ilir Metës, edhe pse jo zyrtare është sinjal që të paktën ngroh sadopak zemrat e shqiptarëve në këto enklava të katandisura në harresë, për shkak të qëndrimit të Tiranës zyrtare.
Në takimet e Metës ka qenë i pranishëm zv.ambasadori shqiptar në Beograd, dhe një diplomat tjetër. Por mungesa e ambasadorit dhe të krerëve të pushtetit vendor dhe faktorit politik shqiptar në Preshevë është mjaft e çuditshme.
Presidenti i Republikës u prit dje në Medvegjë nga përfaqësuesi i Beogradit në Luginë, Zoran Stankoviç, i cili deklaroi për mediat serbe se kjo vizitë jo zyrtare është organizuar nga ana e ambasadës serbe në Tiranë.
“Presheva Jonë”, nga ana tjetër sulmon ashpër deputetin shqiptar në Preshevë, Riza Halimi, kreun e komunës së Preshevës, Ardita Sinani, por edhe Shqipërim Arifin, si dhe kreun e komunës së Bujanocit, të cilët nuk kanë takuar Ilir Metën në Medvegjë.
“Presheva Jonë” thekson se “njëri ishte në Beograd, e të tjerët me pushime, u justifikuan turpshëm për mungesën e tyre për t’u pjekur me kreun e shtetit shqiptar. Kjo tregon se ata nuk përfaqësojnë shqiptarët”.
Mediat serbe megjithatë i kanë dhënë një hapësirë të madhe vizitës duke theksuar më shumë mesazhet e Metës për njohjen e Kosovës nga ana e Beogradi, si dhe të drejtat e shqiptare në Luginë.
Vetë Meta jo pa qëllim e ka mbyllur vizitën me një takim me nxënës e mësues të Medvegjës.
Po sërish është një pikëpyetje mungesa e faktorit politik të Preshevës. Kur Rama e vizitoi Luginën ata ishin të gjithë madje e shpallën edhe “qytetar nderi”.
Hë për hë kjo është një enigmë që natyrisht kërkon që të eksplorohet më shumë… /tesheshi.com/
