Engel, Mustafës: Zbatoni obligimet ndërkombëtare

Kryeministri Isa Mustafa, ka pritur sot në takim kongresistin amerikan, mikun e madh të Kosovës, Eliot Engel.
Kryeministri Mustafa dhe kongresisti Engel në këtë takim biseduan për proceset aktuale në Kosovë, për reformat që po ndërmerr Qeveria e Kosovës në shumë fusha, për përmbushjen e obligimeve ndërkombëtare dhe proceset integruese euroatlantike të Kosovës.
I pari i Qeverisë i shprehu mirënjohjen në emwr të qytetarëve të Kosovës për përkrahjen e vazhdueshme që Shtetet e Bashkuara të Amerikës dhe kongresisti Engel po japin për Kosovën, në të gjitha fushat.
Po ashtu në këtë takim u bisedua edhe për krijimin e Dhomave të Specializuara dhe rëndësinë e madhe që ka themelimi i tyre për Kosovën në këtë fazë, pasi që kjo dëshmon se Kosova ka kapacitet për të marrë vendime të rëndësishme për të ardhmen e saj, për të përmbushur obligimet ndërkombëtare si dhe për të ecur përpara në integrimet euroatlantike.
Ndërsa kongresisti amerikan, Eliot Engel, i vlerësoi lartë progresin që po arrihet në Kosovë dhe përkushtimin e institucioneve e të popullit të Kosovës për të ecur përpara.
Ai shprehu përkrahjen e mëtejshme për avancimin e proceseve dhe progresit në Republikën e Kosovës.
Në këtë takim u bisedua edhe për dialogun dhe normalizimin e raporteve ndërmjet Republikës së Kosovës dhe Serbisë si dhe u vlerësua roli konstruktiv i Kosovës në këto procese./tesheshi.com/