Embargoja ruse nuk do të ndikojë në tregun shqiptar pasi prodhimi vendas i drithërave do të mbulojë mungesat. Kështu shpresojnë autoritetet shqiptare që bazohen tek të dhënat për një vit të mbarë në drithëra.
Ministri i Bujqësisë Edmond Panariti nuk e sheh përfshirjen e Shqipërisë në listën e zezë të Moskës si një problem, madje sipas tij, ajo nuk ka pasur ndikim në eksportin e fruta-perimeve, që duket se është dyfishuar.
“Ju thoni me të drejtë që ne importojmë një sasi të konsiderueshme drithërash nga tregu rus. Inkurajues është se kemi pasur një prodhim mbarë të grurit në vendin tonë”, tha Panariti.
Sipas tij, me grurin e prodhuar në vend janë plotësuar deri më tani 40 për qind e nevojës për bukë, ndërsa këtë vit, tregu vendas mund të mbulojë deri në 70 për qind të nevojave.
Në një takim me prodhuesit, Panariti ka kërkuar që ata të gjejnë mënyrën të tërheqin cdo kokërr gruri të prodhimit vendas, që për më tepër, shquhet për cilësi më të lartë se ai i importit.
Sipas ministrit të Bujqësisë, Edmond Panariti nuk do të ketë as ndryshim të çmimit të bukës.
“Ne këtu do jemi nuk pritet që të ketë rritje të çmimit të grurit dhe të miellit pasi oferta është e bollshme”, tha ai, gjatë një konference me gazetarët.
Në shtator, ai tha se do të udhëtojë drejt Ukrainës me qëllim që prodhimet e freskëta shqiptare e të konservuara të bujqësisë të hyjnë në tregun “me peshë” të Ukrainës. /tesheshi.com/
