Presidentit Thaçi i ka ardhur një mbështetje nga Amerika për themelimin e ushtrisë. Është anëtari i Komitetit për Punë të Jashtme të Kongresit, Eliot Engel, i cili gjatë një takimi të këtij komiteti ka folur për politikën amerikane karshi Kosovës dhe për ushtrinë, me ç’rast ka theksuar se SHBA-të aktualisht janë kundër duke e quajtur këtë qëndrim absurd.
“Ne bëmë të qartë se nuk e mbështesim krijimin e ushtrisë së Kosovës në këtë kohë. Kjo është absolutisht absurde dhe është një qëndrim qe ne duhet ta ndryshojmë shpejt”, tha Engel.
Ai më tej shprehu mendimin e tij karshi formimit të ushtrisë, duke thënë se është e drejtë sovrane që Kosova ta ketë ushtrinë e saj.
“Kjo mund t’ju duket e papritur zoti kryetar, por nëntë vjet me radhë, si një vend i lirë dhe i pavarur, Kosova ende nuk ka ushtri. Kjo është një e drejtë sovrane, mirëpo ky është komb-shtet pa ushtri. Kosova ka një Forcë të Sigurisë të armatosur lehtë, derisa ushtria ruse po e pajisë vendin e saj fqinj”, ka thënë Engel.
Kongresmeni amerikan më tej ka theksuar se ushtria do të jetë multietnike, ashtu siç është tani Forca e Sigurisë dhe policia.
“Ajo do të jetë në partneritet me vendet perëndimore dhe NATO-n në ndjekje të stabilitetit më të madh rajonal dhe ndërkombëtar”, u shpreh Engel, duke theksuar se ushtria do jetë mbrojtëse e jo kërcënuese për fqinjët e Kosovës.
Ndryshe, Thaçi edhe sot ka deklaruar se ushtria do të themelohet si dhe do ruhet partneriteti me miqtë ndërkombëtarë. /tesheshi.com/
