Kriza e emigrantëve në Europë u ka dhënë edhe më shumë “zë” partive ekstremiste në vendet e BE, saqë disa prej tyre po presin të vijnë në pushtet duke shfrytëzuar pasigurinë dhe ankthin e publikut që nuk po merr përgjigje nga partitë tradicionale.
Për herë të parë, e djathta ekstreme pritet të jetë forcë e parë politike në Suedi. Sipas sondazheve, ekstremistët do të marrin 25.2 për qind të votave nëse zgjedhjet do të mbaheshin tani, më shumë se qendra e majtë qeverisëse socialdemokrate me 23.4 për qind.
Në zgjedhjet e vitit 2014, demokratët suedezë u bënë partia e tretë në vend, pasi morën 12.9 për qind të votave, e popullariteti i tyre është rritur në vijimësi.
“Shumë njerëz janë të pakënaqur me qeverinë dhe politikat e saj kur vjen puna për emigracionin dhe integrimin, sikundër edhe për numrin e madh të lypësve. Shumë njerëz nuk i shohin të moderuarit apo partitë e tjera të krahut të djathtë si alternativë, kështu që janë kthyer tek ne”, tha një zëdhënës i demokratëve suedezë.
Për shumë vjet, Suedia ka pasur një qasje liberale ndaj emigracionit, duke pranuar më shumë refugjatë për frymë sesa secili prej vendeve anëtare të BE-së.
Kjo lëvizje e re në Suedi shkon në të njëjtën linjë me frymën e viteve të fundit në Europë, ku partitë e vogla të së djathtës ekstreme po kërkojnë pushtetin duke përfituar nga tensionet nga fluksi i emigrantëve dhe kriza ekonomike.
Në Hungari, gjithashtu ekziston një problem i madh mes politikave të BE-së për emigracionin dhe politikës së qeverisë së kryeministrit Viktor Orban. Ky i fundit mes shumë lëvizjeve kryeneçe ndaj Brukselit, emigracionin e trajton si problem dhe vendi i tij nuk ka pranuar emigrantë, duke ngritur edhe një mur mbrojtës në kufirin me Serbinë.
Qeveria e Orban zhvilloi një pyetësor për emigracionin ku shtron përpara hungarezëve cështje si: nëse ata janë dakord se emigrantët vënë në rrezik mënyrën e tyre të jetës dhe se përhapin terrorizmin?
“Ndërsa Brukseli ka dështuar në adresimin e mirëfilltë të emigracionit, Hungaria duhet të ndjekë rrugën e saj”, këmbëngul Orban.
Sidoqoftë, parti të tilla si Fronti Kombëtar në Francë, apo demokratët suedezë e partia e Lirisë në Austri vijojnë të mbledhim mbështetje dhe njohin vetëm rritje të popullaritetit.
Por, apeli i këtyre partive dhe profili i mbështetësve që ato tërheqin, madje edhe në rajone të sigurta ekonomikisht dhe tepër të arsimuara, mbeten pak të kuptuara.
Në një studim të Chatham House për këto probleme, thuhet se ngjitja e partive ekstremiste e populiste në Europë konsiderohet shpesh e lidhur me ankthin e publikut për kërcënimin e vendeve të punës, strehimin publik dhe përfitimet shtetërore.
Por, sipas raportit, ka të dhëna bindëse se partitë kryesore politike në Europë duhet të shkojnë përtej konsideratave ekonomike në rastin e emigracionit dhe të nisin të flasin për diversitetin kulturor.
Përgatiti: Juli Prifti – /tesheshi.com/
