Prej disa ditësh, në ambientet e Hotel Tirana International është çelur një ekspozitë tapetesh e sixhadesh të llojllojshme, të ardhura nga vende të ndryshme të botës së orientit, me motive të ndryshme, por që bashkohen në një pikë: janë të gjitha të punuara me dorë. Pra “Bio”, thënë kështu, për të saktësuar se ëshët fjala për punë që kanë një origjinalitet të spikatur e nuk janë prodhim indistrial në seri.
Modelet paraqiten në versione të ndryshme, ku përmbajtja e tyre shfaq motivacione të formuara nga kombinimi i figurave gjeometrike si rombet, katrorët e drejtkëndëshat, por edhe të tjera, të cilat paraqesin ngjarje historike, siç mund të jetë një luftë në Mesjetë, një betejë mes kalorësish etj.
Larmishmëri ofrojnë ngjyrat, ku spikatnin ato të ndezurat, që ndihmojnë në kombinimin me ambientet ku mund të vendosen këta aksesorë. Nuk mungojnë as ato më të thjeshtat, me ngjyrat e tokës apo ngjyra të hapura, të cilat janë të përshtatshme për tu përdorur kudo, pavarësisht arredimit të ambientit.
Format e paraqitjes së tapeteve dhe sixhadeve variojnë nga ato klasiket, drejtkëndëshe e katrore, e deri tek ato më modernet. Madhësitë janë të ndryshme, ndërsa organizatorët konfirmojnë se vizitorët kanë treguar më shumë interes tapetet me përmasa të mëdha.
Ekspozita mban firmën e grekes Despina Miraraki. Në të ofrohet mundësia për të përzgjedhur edhe llojin e materialit që mund të duket më i përshtatshëm për ambientin ku do të përdoret. Materialet janë prej leshi, mëndafshi apo pambuku.
Organizatorët pohojnë numrin e lartë të vizitorëve në ekspozitë, që sipas tyre tregon se shijet shqiptare kanë ardhur duke u kultivuar në vite.
Dhe vërtet: pas `90 shqiptarët rendën pas tapeteve dhe mokete, disa dhe tejet surrogato, por që ishi pjesë e etjes së papërmbajtshme për luks e komoditet. Dhe mbasi u mbingopën me të aqshtëquajturin “mall tregu”, nisën të mendonin për gjetje origjinale, duke iu kthyer klasikes, sidomos asaj të punuar me dorë. Por kjo, vetëm për ata që e kanë terezinë, siç thotë populli, pasi çmimet janë paksa të kripura. Si për çdo gjë bio. /tesheshi.com/
