Nga Blendi Gashi
Situata politike në Kosovë ditëve të fundit është acaruar jashtëzakonisht shumë. E gjitha pas nënshkrimit të marrëveshjes për Asociacionin e Komunave me shumicë serbe në Bruksel mes palës kosovare dhe asaj serbe
Është partia opozitare Lëvizja “Vetëvendosje”, e cila me ngulm po e kundërshton këtë Asociacion të cilën e quan ‘Zajednicë’ dhe pushtet të tretë në vend, me ç`rast ka paralajmëruar edhe organizimin e protestave të dhunshme deri në rrëzimin e qeverisë Mustafa.
Duke parë thirrjet për protesta të dhunshme, Policia e Kosovës, gjegjësisht njësia që bënë vlerësimin e rrezikshmërisë e të gjithë institucioneve kyçe në vend (Presidenca, Kuvendi etj) ka marrë vendim që të vendos rrethoja shtesë tek objekti qeveritar.
Ekspertët e sigurisë thonë se me protesta të dhunshme nuk zgjidhen problemet në Kosovë dhe se ka kaluar koha e tyre. Nëse do ketë protesta të tilla, sipas tyre, Kosova do të dëmtohet rëndë dhe do të largohet edhe më shumë nga liberalizimi i vizave.
Eksperti i sigurisë, Naim Maloku ka thënë për portalin “Te Sheshi”, se rrethojat rreth qeverisë, sipas njoftimit, po vendosen për arsye tjera e jo për shkak të kërcënimit të opozitës për protesta dhe paralajmërimet që ato të jenë të dhunshme.
Maloku, thotë se është e drejtë e garantuar me ligj që qytetarët të mund t’i shprehin mendimet dhe qëndrimet e tyre edhe me protesta; por ato duhet të organizohen në atë mënyrë që t’i përmbahen ligjit.
“Mendoj që me protesta të dhunshme nuk zgjidhen problemet në Kosovë dhe që protestat e tilla mund të paraqesin sfidë për organet e rendit dhe shoqërinë në përgjithësi, sepse edhe ndikojnë negativisht në sigurinë e vendit. Mendoj që koha e protestave të dhunshme ka kaluar në shoqërinë tonë dhe të tillat vetëm mund të kenë ndikim negativ në formën e uljes së përkrahjes elektorale për organizatorët e tyre. Këtë fakt duhet ta kenë, mendoj, në mendje edhe partitë opozitare nëse mendojnë me organizuar protesta të tilla”, ka deklaruar Maloku.
Eksperti tjetër i çështjeve të sigurisë, Hajrullah Tërnava thotë për tesheshi.com se opozita mundohet që me organizime të demostratave të dhunshme të arrijë deri te qëllimet e tyre që të vijnë në pushtet. Sipas tij, kjo mënyrë e tyre është tepër e gabuar sepse po të përdoret dhuna në protesta, Kosova do të largohet nga liberalizimi i vizave.
“Nëse do ketë organizim të opozitës për protesta të dhunshme këto mund edhe të ndodhin sepse çdo herë në mesin tonë ka njerëz që i kryejnë detyrat e urdhëdhënësve. Tani pushtetarët nëse kanë indikacione se ato protesta të dhunshme edhe mund të ndodhin atëherë shumë normale është që t’i forcojnë rrethojat rreth objekteve qeveritare”, ka deklaruar Tërnava.
Avni Islami, ekspert i shkencave të sigurisë, ka thënë për tesheshi.com se gjendjen e sigurisë në vend e kanë tensionuar deklaratat e pamatura të kryeministrit por edhe ato të opozitës, gjë që sipas tij të dy palët janë të gatshme të konfrontohen fizikisht.
“Me paralajmërimet e opozitës për protesta radikale në njërën anë dhe veprimet policore në anën tjetër, vetëm se do ta dëmtojnë shtetin e Kosovës edhe ashtu të brishtë por gjendjen faktike nuk ka mundësi ta ndryshojë opozita sepse është shumë e dobët prej që kishte marrë iniciativë që të bëhet VLAN-i. Protesta mund të ketë por me intensitet të ulët për veç disa individëve të frustruar të cilët shumë shpejt do të neutralizohen , natyrisht nëse do të ketë protesta”, ka deklaruar Islami.
Ndryshe, këshilltari i kryeministrit Isa Mustafa për siguri, Edon Miftari, ka sqaruar arsyen e vendosjes së rrethojave shtesë në oborrin e kryeministrisë. Ai ka thënë për mediat se Policia e Kosovës ka bërë vlerësimin e rrezikshmërisë dhe ka rekomanduar që të rritet siguria.
Ai ka mohuar se kjo ka ndodhur për shkak të deklaratave të fundit që kanë ardhur nga ‘Vetëvendosje’ ku ka paralajmëruar rrëzimin e Qeverisë përmes protestave. /tesheshi.com/
