Nga Bashkim Kastrati
Disa biznese në Kosovë po i ikin vazhdimisht tatimit duke manipuluar me kuponët fiskalë, në disa raste duke mos ua dhënë qytetarëve fare, e në disa raste duke i falsifikuar ata. Një hulumtim i tesheshi.com ka gjetur se ka biznese të ndryshme që lëshojnë kuponë jo të rregullt për qytetarët me qëllim që t’i ikin tatimit. Këto janë biznese të vogla, por njëri ndër to ka qenë edhe një biznes i madh i cili ka një rrjet të madh të supermarketeve në Kosovë.
Tesheshi.com ka arritur që të gjejë tre kuponë jo të rregullt, dy të falsifikuar, ndërsa njërit i mungojnë disa të dhëna bazë, përfshirë edhe stemën e Ministrisë së Financave.
Për të verifikuar këta kuponë fiskalë i kemi dërguar tek Administrata Tatimore e Kosovës (ATK). Ky institucion na ka konfirmuar se këta kuponë nuk janë të rregullt, duke specifikuar mangësitë tek të gjithë.
“Paragonet: Fast Food Eni dhe paragon nr: 42131 te marketi? NRB/Adresa? nuk janë kupon të rregullt fiskal, ndërsa kuponi i prerë (shkëputur) te ‘Super Viva’, i mugojnë elementet vazhduese të kuponit fiskal, si Nr i artikujeve, Numri serik i faturave, numri serik i pajisjes fiskale, numri serik i kuponit ditor dhe në fund Llogoja me RKS”, thuhet në përgjigjen e ATK-së.
ATK thotë se në bazë të dokumenteve ligjore limiti minimal i karaktereve në një dokument të printuar (kupon fiskal) duhet që së paku t’i ketë 18 karaktere për rresht dhe letren e gjerë së paku 28mm.
Sipas ATK-së printimi i kuponit fiskal nga Pef, duhet të ketë mundësi të printojë kuponin fiskal për furnizimet e bëra të çdo klienti (qytetari) kuponi duhet të jetë i lexueshëm dhe duhet të përmbajë të gjitha të dhënat.
“Kemi konstatuar se paragonet te Fast Food ENI,dhe te Marketi? NRB? Adresa? paragoni me nr serik;42131 nuk janë kupon të rregullt fiskal, ndërsa tjetri për ‘Super Viven’ i përgjysmuar (i shkeputur) i mungojnë edhe disa elemente (karaktere) që për ne është kupon me përmbajtje fiskale,por që i mungojnë:Numri i artikujeve, numri serik i faturave ( kuponeve) numri serik i pajisjes, numri serik i kuponit ditor dhe në fund Logoja e RKS, që do të thotë se nuk është kupon i rregullt (pa përmbajtje të të gjitha elementeve përfshirëse të një kuponi të rregullt fiskal)”, konfirmon ATK.
Ja çfarë gjobash shqiptohen për raste të tilla
Sipas ATK-së në muajt e fundit po hasin në kuponë të tillë, sidomos në rastet kur qytetarët i dërgojnë qindra kuponë fiskalë për të marrë shpërblim nga ATK, dhe në mesin e këtyre kuponëve të lëshuar nga biznese të ndryshme të cilët janë të parregullt. Pra këto biznese i ikin tatimit përmes kuponëve jo të rregullt.
“Po kemi raste, tani së fundi nga kuponët që dërgojnë qytetarët nëpër plikot e tyre për rimbursim, kemi hasur edhe paragon të tillë dhe kupon jofiskal, të cilët adresohen të departamenti përkatëse, për të vazhduar me tutje në ndëshkimin e këtyre bizneseve të cilët lëshojne kupon jo të rregullt. Për raste të tilla ATK-ja, zbaton ndëshkimet ligjore sipas paragrafëve 2.1, 2.2, 2.3, 2.4, të Nenit 53 të ligjit për Administratën Tatimore dhe Procedurat”, thuhet në përgjigjen e ATK-së.
Sipas Ligjit për ATK-në, përkatësisht nenit 53 thuhet se çdo person i nga i cili kërkohet të krijojë ose mbajë regjistrime, përfshirë kërkesën për të vendosur numrin fiskal të biznesit në të gjithë kuponët dhe faturat e lëshuara, sipas legjislacionit të zbatueshëm në Republikën e Kosovës dhe i cili nuk e kryen këtë do t’i nënshtrohet një ndëshkimi administrativ si vijon:
Tatimpaguesi me qarkullim vjetor deri 30 mijë euro, ndëshkim
administrativ prej 125 euro; Tatimpaguesi me qarkullim vjetor nga 30 mijë deri 200 mijë euro ndëshkim administrativ prej 250 euro; Tatimpaguesi me qarkullim vjetor nga 200 mijë deri 500 mijë euro ndëshkim administrativ prej 500 euro; Dhe tatimpaguesi me qarkullim vjetor prej 500 mijë euro ndëshkim administrativ prej 1,000 euro. /tesheshi.com/
