Nga Saimir Sulaj, New York
Kongresmeni amerikan Dan Donovan e sheh si jetik rolin e Shteteve të Bashkuara në botë, sidomos në vendet me demokraci të brishtë apo që kanë ende probleme tranzicioni.
Ligjvënësi republikan, në një prononcim të shkurtër për portalin tesheshi.com shprehet se një botë e qëndrueshme është në interes të SHBA-së për sigurinë kombëtare të saj.
“Për vetë interesat e SHBA-së, kur ka qëndrueshmëri në botë, kur ka paqe në botë, kur ndihmojmë njerëzit që kanë nevojë për ndihmën tonë, qoftë edhe kur bëhet fjalë për arsimimin, qoftë kur flitet për shëndetësinë, apo në problemet për furnizimin e tyre me ushqim apo kur ndihmojmë që të ketë paqe në një vend,është më mirë për Shtetet e Bashkuara të Amerikës. Kur ka qëndrueshmëri në botë, është në interes për sigurinë kombëtare të SHBA-së dhe të çdo vendi në botë”, u shpreh kongresmeni Donovan.
Duke nënkuptuar që SHBA duhet të forcojë rolin e saj edhe në Ballkan, ku jetojnë shumica e shqiptarëve, Donovan tha se vendi i tij duhet të tregojë kujdes, pasi atje ku ata tërhiqen, boshllëkun e zënë vende të tjera si Rusia apo Kina.
“Duhet të tregojmë kujdes sepse kudo në botë ku Amerika është tërhequr, ai boshllëk është mbushur nga vende të tjera, qoftë Rusia apo Kina. Dhe kjo është bërë, qoftë edhe duke siguruar ushqim apo medikamente për popullsi të caktuara”, tha Donovan.
Dan Donovan është zgjedhur në distriktin e 11-të të New York-ut si i vetmi republikan që përfaqëson këtë shtet në Kongresin amerikan. Zona e tij përfshin atë që njihet si Staten Island në New York, ku banon një komunitet jo i vogël shqiptarësh. /tesheshi.com/
