Autoritetet egjiptiane kanë ekzekutuar një mbështetës të ish-presidentit Muhammed Mursi. Personi i cili u ekzekutua qe dënuar për vrasje.
“Autoritetet e burgjeve të Egjiptit ekzekutuan me varje Mahmud Ramadanin sipas vendimeve të gjykatës dhe pas mbarimit të të gjitha apeleve,” tha të shtunën në një deklaratë ministri i Punëve të Brendshme.
Ramadani u dënua për hedhjen e kundërshtarëve nga çatia e një ndërtese në qytetin bregdetar të Aleksandrisë në verën e vitit 2013.
Ai është mbështetësi i parë i Mursit i ekzekutuar me varje që kur ushtria e detyroi forcërisht presidentin e zgjedhur ta linte postin në mesin e 2013-s.
Gjykata penale e Aleksandrisë e dënoi Ramadanin me vdekje në maj të vitit 2014, një vendim që mori miratimin në shkurt.
Vrasja për të cilën u dënua Mahmud Ramadani ndodhi dy ditë pasi ushtria e largoi nga zyra Mursin, pas protestave ndaj qeverisjes së tij njëvjeçare.
Që prej asaj kohe autoritetet egjiptiane të mbështetura nga ushtria kanë nisur shtypjen e mbështetësve të Mursit, e të Vëllazërisë Muslimane, duke vrarë qindra njerëz e duke burgosur mijëra të tjerë. /tesheshi.com/
