Përshkallëzohen dëmet nga reshjet e orëve të fundit që kanë përfshirë të gjithë vendin. Shirat e shoqëruar nga era e fortë rrëzuan disa shtylla tensioni dhe janë këputur përcjellësit, duke lënë në errësirë të plotë mijëra banorë. Operatori i Shpërndarjes së Energjisë Elektrike njofton se kanë pësuar avari 39 fidra, ndërsa zonat më problematike janë cilësuar Tirana, Durresi e Vlora, kryesisht në zonat rurale.
Në kryqytet defekt pësuan gjatë natës fidrat në Qerekë, Tapizë dhe pjesërisht në Ibë, Kamëz, Peze, Zall Bastar dhe Mullet.
Në rajonin e Durrësit janë pa energji disa familje në Rashbull, Sukth, Maminas, sektori Rinia, si dhe në disa zona të Krujës.
Në Vlorë u shënuan avari në Amonice, Kocul, Kallarat, Radhime, Brataj, Babice Gorisht dhe Himarë. Probleme pati edhe në Gjirokastër, Berat, Lushnje etj.
Në këto kushte, OSHEE ka angazhuar në terren rreth 1500 punonjës të organizuar në grupe për të riparuar defektet e shkaktuara nga moti i keq. Po ashtu, janë marrë masa për furnizimin me energji të institucioneve kryesore, sic janë spitalet, ndërsa hidrovoret janë në punë dhe punojnë normalisht./tesheshi.com
