Efekti “Kur’an” mes Turqisë dhe Suedisë

Turqia nuk do të dorëzohet nën “presion” dhe do të kundërshtojë pranimin e Suedisë në NATO nëse kjo është një “barrë” për Organizatën e Traktatit të Atlantikut të Veriut, tha ministri i Jashtëm turk Hakan Fidan.

“Turqia nuk e miraton ushtrimin e presionit. Ne jemi parimorë”, tha Fidan dhe i bëri thirrje Suedisë që “të përmbushë detyrat e saj” në mënyrë që të mund të anëtarësohet në NATO.

“Çështja nëse pranimi i Suedisë në NATO është një barrë apo një avantazh në aspektin strategjik dhe të sigurisë është gjithnjë e më shumë objekt debati,” tha ai shtatë ditë përpara samitit të NATO-s më 11-12 korrik në Vilnius.

Një takim mes Suedisë dhe Turqisë duhet të mbahet të enjten në Bruksel, ku duhet të mblidhen ministrat e jashtëm, shefat e shërbimeve sekrete dhe këshilltarët e sigurisë kombëtare, kujton AFP.

Djegia e Kur’anit

Ankaraja, e cila ka bllokuar hyrjen e Suedisë në NATO që nga maji 2022, kritikoi Suedinë javën e kaluar pas djegies së Kur’anit në Stokholm, të cilën qeveria suedeze e “dënoi ashpër” dhe e quajti “islamofobike”.

Një akt i tillë “ndryshon perceptimin e sigurisë në Suedi”, tha ministri turk.

Një provokim i ngjashëm ndodhi në janar kur një militant i krahut të djathtë dogji librin e shenjtë islam.

Turqia, i vetmi nga 31 shtetet anëtare të NATO-s, përveç Hungarisë, që nuk e ka ratifikuar pranimin e Suedisë në NATO, ka akuzuar Stokholmin se është treguar i butë me militantët kurdë që kanë gjetur strehim në këtë vend nordik. Sjellja me Kur’anin ia shton më tepër “mëkatet” si vend. /tesheshi.com/