Studiuesit zviceranë kanë publikuar rezultatet e një studimi i cili tregon efektet pozitive të çokollatës mbi arteriet. Natyrisht, jo çdo lloj çokollate: vetëm çokollata e zeze, e cila përmban më shumë se 70% kakao.
Mendohet se çokollata ka një veprim pozitiv mbi sistemin kardiovaskular, bazuar mbi veprimin e saj të fuqishëm antioksidues, i cili vjen nga prania e flavonoideve në kakao.
Studimi është bërë duke krahasuar veprimet e çokollatës së zezë që përmban 73% kakao, me ato të çokollatës së bardhë që përmban me pak se 4%. Ky krahasim është bërë tek rreth 20 vullnetarë, të gjithë përdorues të duhanit, sepse tek ata rreziku vaskular është gjithmonë i pranishëm.
Pas një mungese 24 orësh ushqimesh të pasura me antioksidues si çaj, lakra, verë e kuqe, kakao etj, u vlerësuan funksionet endoteliale. Dy orë pas ngrënies të 40 g çokollate të zezë ose të bardhë këto funksione u vlerësuan përsëri.
Vetëm çokollata e zezë me 73% kakao solli një përmirësim të zgjerimit të artereve dhe të qarkullimit arterial dhe ulje të agregimit te pllakave./tesheshi.com/
