Qeveria polake ka reaguar menjëherë pas ngjarjeve tragjike në Bruksel, duke deklaruar se nuk është më e përgatitur të presë refugjatë e të respektojë marrëveshjen me BE-në.
Kryeministrja e vendit, Beata Szydlo, tha një ditë më parë se ajo nuk sheh asnjë mundësi që refugjatët të vijnë në Poloni.
Zëdhënësi i qeverisë, Rafal Bochenek, u shpreh gjithashtu në të njëjtën ditë se Polonia nuk është në gjendje të presë emigrantë për momentin. Qeveria, sipas tij, druhet se Europa nuk është e aftë t’i eliminojë rreziqet për sigurinë që burojnë nga ardhja në masë e refugjatëve. “Gjëja më e rëndësishme për ne është siguria e polakëve,” ka thënë Bochenek.
Polonia qe angazhuar të presë 7.000 refugjatë pas negociatave me BE-në, ndërsa kishte planifikuar të merrte 400 të tillë gjatë këtij viti, e të tjerët do të vinin në vitet pasardhëse.
Partia në pushtet në Poloni, Ligj dhe Drejtësi, ka një qëndrim të ashpër ndaj emigrantëve, por pati lënë të kuptohet se do ta respektonte angazhimin e qeverisë së mëhershme për të pritur 7.000 refugjatë.
Reagimi i tillë polak nuk është diçka e re, pasi i njëjti refuzim për të pranuar refugjatë qe bërë i njohur dhe pas ngjarjeve të Parisit vitin e shkuar. /tesheshi.com/
