Eduart Selami, ish-deputet dhe kandidat për postin e kreut të PD-së përballë Lulzim Bashës në zgjedhjet e 22 korrikut, i ka drejtuar një apel grupimeve në partinë më të madhe të opozitës që të ulin tonet dhe të bashkëpunojnë për ringritjen e kësaj partie.
Selami shprehu kritika për Bashën në lidhje me garën në PD, të cilën e konsideroi të pabarabartë, ndërsa ftoi kritikët të ulin tonet.
Selami gjithashtu kritikoi idenë e bojkotit, sikundër u bë në zgjedhjet e brendshme në PD.
“Basha dhe kritikët duhet të zbuten. Basha duhet të telefononte Patozin, Bregun dhe Topallin e të fliste me ta. Unë them që Basha duhet të mblidhte grupin e vjetër parlamentar dhe të bënte kalimin e stafetës. Këtu humbi një rast”, tha Selami, i cili sqaroi se nuk do të kandidojë për asnjë post në PD.
Por ai shtoi se është i gatshëm të japë kontributin, pavarësisht se nuk do të kandidojë për asnjë post në PD.
“Pavarësisht se kishte mangësi e manipulime dhe pavarësisht se Basha nuk është prononcuar ende për këtë fakt për turpin e tij, unë prapë i uroj suksese dhe shpresoj që PD të fitojë zgjedhjet e radhës. Unë i qëndroj asaj që nuk bojkotohet partia. Kritikët nuk i shërbyen as vetes dhe as Partisë Demokratike. Kam thënë që fushata ishte e pabarabartë dhe e padrejtë, por unë sërish e njoh legjitimitetin e zotit Basha sepse mendoj se është në të mirë të forcës sime politike”, deklaroi Selami në Top Channel.
Në lidhje me kritikat e Sali Berishës mbi listën e PD-së, Selami u shpreh se “nuk besoj se lista është bërë pa bekimin e Berishës. Kritikat që i ka bërë Bashës janë të vonuara, por të drejta. Por, për mendimin tim, nuk besoj se lista që paraqiti Lulzim Basha është bërë pa miratimin e Sali Berishës”.
Selami, i cili nënvizoi gjithashtu se “Partia Demokratike sot është më pak demokratike sesa në fillimet e saj”, theksoi se “është krenar” që është pjesë e kësaj partie. /tesheshi.com/
