Kryeministri shqiptar, Edi Rama, ka anuluar vizitën në Maqedoni, të parashikuar më 14 maj.
Siç mësohet nga burime zyrtare të Ministrisë së Jashtme, kanalet diplomatike kanë vendosur që të mos zhvillohet vizita e parashikuar shumë herët ku përveç Shkupit, kreu iqeveverisë shqiptare do të vizitonte dhe qendrën më të madhe të banuar nga shqiptarët në Maqedoni-Tetovën.
Siç theksojnë burimet zyrtare në MPJ, Edi Ramës do t’i dorëzohej në Universitetin shtetëror të Tetovës, titulli “honoris causa”. Ky universitet, i cili është i vetmi institucion i lartë publik në gjuhën shqipe në Maqedoni, e ka marrë vendimin prej ditësh nga ana e senatit të tij që të nderojë me këtë titull Kryeministrin shqiptar.
Anulimi ka ardhur pas operacionit të Kumanovës ku u shkatërrua tërësisht një lagje e banuar nga shqiptarët dhe u terrorizuan banorët e saj pas një operacioni masiv kundër një grupimi të armatosur që ende nuk idihet identiteti.
Qeveria shqiptare në disa deklarata të njëpasnjëshme që prej të shtunës së shkuar e ka cilësuar operacionin në Kumanovë si një “sulm etnik” dhe i ka bërë thirrje qeverisë së Gruevskit që të ndalë përplasjen ndëretnike.
Marrëdhëniet mes Shkupit dhe Tiranës janë në një pkë mjaft kritike dhe mësohet se diplomatët shqiptarë në Shkup janë thirrur nga MPJ e Maqedonisë për të kërkuar shpjegime mbi qëndrimet e qeverisë shqiptare.
Ndërkaq, anulimi i vizitës së Ramës normalisht është ndikuar edhe nga fakti që më 17 maj është planifikuar një protestë e madhe e opozitës së Maqedonisë në Shkup, pas një serie përgjimesh telefonike të publikuara nga LSDM-ja e Zoran Zaev, ku hidhen drtitë mbi abuzimet e qeverisë aktuale të Shkupit.
/tesheshi.com/
