Nga Blendi Gashi
Raportet e Auditit në Kosovë kanë zbardhur një varg shkeljesh ligjore e keqpërdorimesh të parasë publike në shumë institucione kosovare.
Ministra e kryetar komunash janë gjetur se kanë paguar para për projekte të cilat nuk janë realizuar asnjëherë, kanë keqpërdorur veturat zyrtare e kanë punësuar njerëz pa kontrata.
Keqpërdorimeve, u prijnë ish presidentja e vendit, Ahtifete Jahjaga e kryeministri Isa Mustafa, si dhe shumë ministra. Por të gjitha këto me shumë gjasë mund të mbesin pa u ndëshkuar.
Pikërisht për gjetjet e Auditit ditë më parë kryeprokurori i Shtetit, Aleksandër Lumezi, zhvilloi një takim me Auditin e Përgjithshëm të Kosovës, Besnik Osmani.
Ata i bën thirrje për bashkëpunim të gjitha institucioneve që kanë qenë subjekt i auditimit që të bashkëpunojnë me zyrën kombëtare të auditimit për implementimin e rekomandimeve si dhe me zyrën e kryeprokurorit të Shtetit, lidhur me rastet ku ka dyshime të arsyeshme se është kryer ndonjë vepër penale.
Por shtrohet pyetja se a duhet të merret prokuroria e Shtetit me gjetjet e Auditit?
Njohës të ligjeve, analistë dhe opozitarë shprehen se Prokuroria duhet të hetojë gjetjet e Auditit.
Riza Smaka, profesor universitar thotë se përkundër se Auditi rregullisht ka raportuar abuzime financiare të ndryshme e të shumta, çuditërisht deri tani Prokuroria e Shtetit për raste të tilla praktikisht nuk ka ndërmarrë masa ligjore.
“Pasiviteti dhe indolenca e tillë e Prokurorisë së Shtetit e manifestuar deri tani medomos do të duhej të braktisej nëpërmjet ndërmarrjes së veprimeve të ndjekjeve penale të keqbërësve të tillë të cilët kryesisht janë funksionarë publikë”, ka thënë Smaka, për tesheshi.com.
Analisti politik, Faik Krasniqi, thotë se prokuroria e Shtetit është dashur të merret me shumë çështje që i takojnë, por deri më tash s’ka pasur asnjë rezultat, përveç fjalëve të kota të kryeprokurorit Aleksandër Lumezit, i cili erdhi në krye të saj me fjalë mëdha, duke ju shpallur ”luftë” të ”fortëve” të politikës dhe parapolitikës.
Krasniqi thotë se Prokuroria e Shtetit duhet të hetojë çdo rast të keqpërdorimit dhe korrupsionit që kanë ndodhur në Kosovën e pasluftës, e që janë me mijëra raste për hetim.
“Duhet që mbi bazën e ligjeve, prokuroria e Shtetit të iniciojë dhe hetojë guximshëm të gjithë ata që kanë shkelur ligjet e Kosovës, për t’u përballur me drejtësinë që nga zyrtari më i rëndomtë i shtetit e deri te presidenca e vendit, pra në të gjitha nivelet. Vetëm përmes saj mund ta fillojë të kthehet shteti në binarët e sundimit të ligjit, e jo të pushtetarëve sundimtarë mbi ligjin.
Prokuroria dhe gjyqësori duhet të veprojnë, të bëjnë diferencimin brenda këtyre institucioneve dhe ata që mbesin të bëjnë veprim ndaj kujtdo qoftë që ka shkelur ligjin. Por, duke marrë parasysh që Lumezi është emëruar nga shkelësit e ligjit, gjegjësisht nga mafio-politika, nuk besoj që do të ndodh një gjë e tillë”, ka thënë Krasniqi, për tesheshi.com.
Deputeti opozitar, Zafir Berisha, thekson se Auditi është tregues se edhe Isa ka vazhduar në rrugën e Hashimit sa i përket keqpërdorimeve të parasë puplike.
“Prokuroria e Shtetit ka shumë fakte tashmë publike për hetim dhe pres që me këta keqpërdorime të qëllimshme që janë bërë në të gjitha njësitë buxhetore të mirren dhe njëherë e përgjithmonë të dihet sa ata që keqpërdorin paranë puplike vendin e kanë në burg”, ka thënë deputeti Berisha për tesheshi.com.
Prokuroria: Do t’i trajtojmë rastet në kuadër të kompetencave që kemi
Liridona Kozmaqi, thotë se kryeprokurori i Shtetit Aleksandër Lumezi do të kërkoj nga Auditi që t’ia dorëzoj raportet e auditmit, për ato raste ku ekziston dyshimi se mund të jetë kryer ndonjë vepër penale, që është e inkriminuar me Kodin Penal të Republikës së Kosovës.
“Më pas prokurori i Shtetit të gjitha ato raste do t’i trajtoj në kuadër të kompetencave që ka”, ka thënë Kozmaqi, për tesheshi.com. /tesheshi.com/
