Kryetari i NISMA-s Socialdemokrate dhe zv.kryeministri Fatmir Limaj i ka dalë kundër Thaçit për idenë e korrigjimit të kufijve duke thënë se asnjë nga bartësit e institucioneve përfshirë atë, por as presidenti e kryeministri nuk kanë të drejtë të bisedojnë në emër të Kosovës për një autonomi ose për një “Republikë Srpska” në Kosovë.
Sipas Limajt, kjo nuk do të lejohet të ndodhë me asnjë çmim.
“Ne nuk mund të pranojmë dhe nuk do të lejojmë asnjëherë një ‘Republika Srpska’ në Kosovë, asnjëherë, me asnjë çmim. Kosova është më e madhe se bartësit e institucioneve dhe qytetarët e Kosovës kurrë nuk kanë për ta pranuar. Ne nuk do ta pranojmë një gjë të tillë”, ka thënë Limaj për “KosovaPress”.
Ai më tej thotë se Kosova është një realitet tjetër dhe nuk do të lejohet kurrë skenari i Bosnjës. Sa i përket fazës finale të dialogut numri dy i qeverisë së Kosovës thotë se nuk ka nisur ende.
Dialogu final, sipas Limajt nënkupton një marrëveshje, e cila çon në njohjen e dy vendeve dhe se ky dialog nuk do të zhvillohet nga një individ, por nga ekipi negociator ku do të përfshiheshin pozitë-opozitë dhe shoqëria civile. /tesheshi.com/
