Nga Blendi Gashi
“Korrupsioni e krimi politik të hetohet deri në nivelet më të larta, kushdo qofshin ata. Asnjë proces integrues i vendit s’guxon të mbetet peng i tyre.”
Ky ka qenë një nga mesazhet e qarta që dha sekretari amerikan i Shtetit, John Kerry gjatë vizitës së tij në Kosovë.
Por siç duket qeverisë së Kosovës aspak nuk i bën përshtypje mesazhi i Amerikës.
Dëshmia më e mirë është se kryeministri Mustafa vazhdon të punësojë në poste të larta qeveritare njerëz që më parë janë shkarkuar nga detyra, pikërisht për keqpërdorime me pozitën shtetërore.
Agron Demi, drejtor i Institutit për Studime të Avancuara ka mbetur i shokuar kur ka mësuar se Gjergj Dedaj është emëruar në pozitën e zv.ministrit të Ministrisë së Administrimit dhe Pushtetit Lokal (MAPL).
Demi, përmes një postimi në Facebook ka shkruar se “jo, sekretari Kerry, po edhe presidneti Obama e kancelarja Merkel me u qu e me ardh me nejt nga një javë në Kosovë, nuk mund t’i ndalë udhëheqësit e qeverisë nga promovimi i së keqes në këtë vend.”
“Tash, Gjergj Dedaj, i cili është shkarkuar një herë për keqpërdorim të avanseve sa ka qenë zëvendësministër në MPMS, vazhdon të merr rrogë nga taksat tona, madje edhe gjashtë muaj pasi që ta kryej mandatin, falë zemërgjerësisë së një vendimi të qeverisë disa ditë më parë, i cili i shpërblen këtë tufë zëvendësministrash me pagë edhe pasi ta kryejnë mandatin”, ka deklaruar Demi.
Është pikërisht,dekriminalizimi i institucioneve të vendit, ekzekutivit, legjislativit, dhe gjyqësorit, që konsiderohet jetike për shtetin ligjor dhe të së drejtës.
Mungesa e hartimit të ligjit mbi dekriminalizimin e politikës kosovare dhe pushtetit si në nivelin qendror ashtu edhe lokal, vazhdon të lë të lirë njerëzit e inkriminuar të politikës të cilët nuk po i kap drejtësia.
Deputeti i LDK-së, Adem Salihaj, në një prononcim për tesheshi.com thotë se çështja e luftës kundër krimit dhe korrupsionit është një çështje komplekse. Megjithatë, ai thotë se nuk duhet pritur një luftë të shpejtë dhe efikase kundër dekriminalitetit.
“Jo një herë, por shumë herë personalitete ndërkombëtare kanë deklaruar se institucionet e Kosovës duhet ta luftojnë krimin dhe korrupsionin. Por, përderisa të gjithë ata akterë politikë që me vite i kanë krijuar strukturat e krimit dhe korrupsionit, janë edhe sot në skenën politike, atëherë nuk ka as logjikë e as ndonjë shanse që të bëhet një luftë serioze kundër këtyre dukurive negative. Madje, mund të thuhet se ndërkombëtarët për shumë vite me radhë i kanë përkrahur partitë e lidhura me krimin dhe korrupsionin. Si pasojë e gjithë kësaj e kemi gjendjen që e kemi. Dhe tash për tash nuk kemi gjasa që ta ndryshojmë”, ka deklaruar Salihaj.
Ish-deputeti,Naim Maloku, ka deklaruar për tesheshi.com se së pari është presioni mbi Shqipërinë për ligjin për dekriminalizimin, ku edhe do të bëhet testi i radhës për rajonin.
Ai thotë se pas Gjykatës Speciale patjetër edhe Kosova ka me qenë e detyruar që ta miratojë ligjin për dekriminalizimin e politikës.
“Të dhëna kanë mjaftë dhe vetëm kanë me ia dhënë listën institucioneve të Kosovës dhe ka me qenë e detyruar në zbatim. E kanë kaluar Sllovenia, Kroacia, Bullgaria, është duke e kaluar Shqipëria, ashtu do të ndodhë edhe me Kosovën, rrugë tjetër nuk ka”, ka deklaruar Maloku. /tesheshi.com/
