Hatice Cengiz, e fejuara e Jamal Khashoggi, gazetart saudit të vrarë më 2 tetor në ndërtesën e konsullatës saudite në Turqi, u ka bërë thirrje të gjithë muslimanëve të botës që të luten për të ndjerin. Ankthi që shoqëron rastin Khashoggi tashmë, është mosgjetja e trupit të tij, që thuhet se është shpërbërë.
“Unë u bëj thirrje muslimanëve në mbarë botën që të premten e ardhshme, më 16 nëntor, të luten për Jamal Khashoggi, sidomos Xhaminë e Profetit në Medinë. Allahu e pranoftë atë prej shehidëve”, shkroi Cengiz në rrjete.
Mesazhi i saj ka të bëjë me ftesën për ritin e faljes së xhenazes, dedikuar një të vdekuri, por që që do të ndodhë në virtualitet pasi trupi i tij nuk ekziston.
“Ata ju kanë vrarë, kanë thyer trupin tuaj, duke ndaluar mua dhe familjen tuaj që t’ju varrosin në Medine, ashtu siç dëshironit. Zoti im!”, ishin fjalët e vejushës së Jamal Khashoggi, me të cilin do martohej. Madje dhe arsyeja e futjes në konsullatë, aty ku u ekzekutua, ishte pikërisht një dokument për martesë.
Arabia Saudite e pranoi vrasjen gati dy javë pas zhdukjes dhe ka vënë në pranga 18 persona si autorë të saj. /tesheshi.com/
