Ja ku vjen dhe ora e së vërtetës për përfaqësuesen shqiptare. Pas dy tentativave të dështuara për t’i mbyllur hesapet, e për të mos e lënë për në fije të perit kualifikimin, sonte luhet pa dyshim 90-minutëshi më vendimtar në historinë e vjetër e të re të futbollit shqiptar.
Kombëtarja shqiptare ka lënë prapa krahëve humbjen me Serbinë, duke udhëtuar për në Armeni me synimin e vetëm: fitoren! Asnjë alternativë tjetër nuk është e pranueshme. Ata duan të shkruajnë sonte historinë, edhe pse nuk mundën ta bëjnë këtë gjë më herët.
Në kryeqytetin e Armenisë, në Jerevan, pritet të shihet në fushë një skuadër më sulmuese. Edhe pse nuk dihet formacioni kryesor, shenjat flasin për një aktivizim të njëkohësishëm të Cikalleshit dhe Shkëlzen Gashit si sulmues të deklaruar.
De Biazi mendohet të rreshtojë në mbrojtje Canën, Ajetin, Hysajn e Lenjanin. Mesfusha do të jetë e tëra për Bashën Xhakën, Abrashin e Memushjan apo Roshin. Ndërsa sulmi do të ketë Cikalleshin dhe Gashin, ekstremi tjetër i fushës, porta jonë, do të mbrohet si gjithmonë nga Berisha.
Në konferencën për shtyp, tekniku italian i përfaqësueses kuqezi është treguar optimist se gjithçka do të shkojë mirë e fitorja do të arrihet.
“Shpresojmë që kualifikimin ta arrijmë këtu, dhe me shumë gjasa do t’ia dalim. Jemi shumë të motivuar për ta realizuar ëndrrën tonë. Jemi përgatitur për të luftuar kundër Armenisë,” kanë qenë fjalët e tij.
Ndeshjen e kësaj të diele mes Armenisë dhe Shqipërisë do ta drejtojë një treshe polake, me kryesor gjyqtarin Szymon Marciniak.
Takimi, për të mirën tonë, nuk është se ka ngjallur shumë interes te armenët, që me gjasa nuk do të jenë të shumtë në shkallët e stadiumit. Ky i fundit i ka hapur dyert për herë të parë në vitin 1938, për t’u rinovuar dy herë në dhjetëvjeçarin e shkuar, në vitet 2000 dhe 2008. Kapaciteti i tij nuk është shumë i madh, saktësisht 14.530 vende, dhe gjer në 1999-ën është quajtur “Stadiumi Dinamo”.
Urojmë që Jerevani t’u sjellë fat djemve tanë, t’i nderojë ata edhe ne. Suksesi qoftë me ta sonte! /tesheshi.com/
