Nga Gjon Neçaj
Një ngjarje e përmasave sureale ka ndodhur së fundi në veriun e thellë të Shqipërisë, pikërisht në Lekbibaj të Tropojës. Një mace e egër në madhësinë e një qeni është parë të endet në fshatrat e zonës, derisa është kapur nga një banor e është burgosur në një kafaz si ndëshkim për një krim që ka bërë.
Jo, nuk është përrallë, sepse macja e egër ka hyrë në stallën e bagëtive të fshatarit me inicialet A.G, atij pra që e ka mbyllur pas hekurave “pa gjyq”, pasi i ka ngrënë një gic të porsalindur dhe dy-tre pula.
Por ai nuk është lënë ta shijojë plotësisht hakmarrjen ndaj maces vrastare, pasi ka hasur në reagimin e disa shoqatave ambientaliste që veprojnë në zonë, e që kanë instistuar që ta lirojë atë.
“Pas insistimit tonë, thotë Ndoc Mulaj për tesheshi.com , përfaqësuesi shoqatës Alpe dhe një nga eksploruesit më të zellshëm të florës, faunës e speleologjisë në këtë zonë të lakmueshme për turistët vendas dhe të huaj, macja është lënë e lirë dhe është lëshuar në pyll”.
“E falënderoj shumë banorin e fshatit ku macja e egër, kafshë e rrallë e këtij rajoni u shfaq dhe dëmtoi ekonomikisht atë. Falënderim të veçantë ai mori edhe nga përfaqësuesit e shoqatave gjermane GIZ dhe PPNEA, të cilat u njoftuan menjëherë për lirimin e saj”, tha Ndoc Mulaj, duke shtuar se me këtë akt banori është tashmë ruajtës dhe mbrojtës i biodiversitetit në Parkun Natyror Rajonal të Nikaj Merturit.
Pra, fshatari vërtet humbi tre pula dhe një gic, por ama fitoi statusin e një njeriu që përkujdeset për natyrën duke sakrifikuar inatet individuale të momentit. /tesheshi.com/
