Kjo thuajse pritej pasi të zyrtarizohej bojkoti final i PD-së në zgjedhjet e 18 qershorit.
Tre anëtarët e opozitës braktisën mbledhjen e KQZ-së ku po shqyrtoheshin listat shumemërore të kandidatëve për deputetë për zgjedhjet parlamentare të 18 qershorit për nëntë subjekte politike.
Largimi nga mbledhja erdhi pas rrëzimit me votë nga katër anëtarët e mazhorancës të propozimit të nënkryetarit të KQZ-së, Hysen Osmanaj, për shtyrjen me 24 orë të shqyrtimit të listave të pesë partive.
“Unë them që pesë parti, Aleanca Demokratike, Aleanca Demokristiane, Aleanca Arbnore Kombëtare, Fryma e Re Demokratike dhe Partia Komuniste e Shqipërisë, të merren në shqyrtim nesër; ka afat dhe të shtyhet 24 orë,” propozoi ai.
Osmanaj tha gjatë mbledhjes se, “Materialet na kanë ardhur në orën 16:00 dje ose më vonë. Më rezultojnë se kanë parregullsi të mëdha. Propozoj që pesë parti të mos i kalojmë sot. Të kalojmë partitë që nuk kanë lista mbështetëse, Partinë Socialiste, Partinë Kristian Demokrate, Aleancën Popullore për Drejtësi dhe Partinë Socialdemokrate. Kemi 48 orë afat, pra, kemi afat edhe nesër për t’i verifikuar.”
Por nëse do të vonohej sërish nga KQZ-ja mosmiratimi i listave të kandidatëve, atëherë ka shumë gjasa që PD-ja të dilte e të deklaronte se ligjërisht është shkelur afati final i zyrtarizimit të 18 qershorit, çka e ka bërë edhe dy herët e tjera me afatin e partive dhe koalicioneve. /tesheshi.com/
