Nga Bardha Nergjoni
Nëse do të udhëtosh drejt Elbasanit të premten e çdo jave mos zgjidh transportin publik. Quhet publik por në fakt është privat dhe nuk mbulon as 30% të udhëtarëve, kryesisht studentë që nisen drejt këtij qyteti.
Kryeqyteti nuk i ofron asgjë udhëtarëve, madje as pritjen dinjitoze dhe, që të mund të kesh një sedilje për të mbërritur në destinacion, duhet të bësh një luftë të vërtetë me më të fortët që janë kryesisht meshkuj.
Tashmë të gjendur përballë sfidës së madhe, studentët, që janë edhe më të shumtët, janë munduar të gjejnë zgjidhje. Bashkohen grupe-grupe, zgjedhin më të shkathtin e tyre dhe ai zë sedilje për të gjithë grupin. Ndërkohë një tjetër mënyrë sipas studentëve është të kesh mik faturinon, madje duke i dhënë edhe ndonjë lek shtesë mjaft që të të ruajë sediljen e autobuzit pasi në të kundërt mbetesh në Tiranë.
Kjo situate, sipas studentëve që kanë edhe hallin më të madh, bëhet e tillë çdo të premte nga mesdita e deri në mbrëmje. Të gjithë dynden për të zënë një vend, kush është më i fortë arrin, kush nuk rrezikon duhet të presë autobuzin e radhës nëse ka fat të sigurojë sërish një vend pasi udhëtarët sa vijnë e shtohen. Me fillimin e universitetit e së shpejti të masterave, pritet shtim i studentëve që do të përdorin transportin publik (privat) drejt Elbasanit, ndërkohë që mjetet e transportit të kompanive që veprojnë në këtë treg janë të njëjta.
Ledia, një studente e Matematikës në Universitetin e Tiranës thotë se është dashur të paguajë deri në 1000 lekë të reja kur bileta drejt Elbasanit kushton 150 lekë pasi nuk mund të ngjiste dot valixhen e saj në autobuzat e transportit por ka prenotuar një furgon linje.
“Kam pritur me orë të tëra. Edhe në autobus është me mik. Kisha dhe valixhen dhe ishte e pamundur. Gjeta një furgon që më kërkoi 1 000 lekë të reja për të shkruar deri në Elbasan. E kuptoni sa e vështirë është për ne studentët. Vijmë për të studiuar dhe presim me orë të tëra këtu si kafshët pasi asnjë kusht nuk ka. Tani është diell,por në shi ku do rrimë? Ja ky është shteti ynë” pwrfundon ajo e revoltuar.
Autobuzët dhe furgonët drejt Elbasanit janë të paktë, sidomos të premten ku të udhëtosh është bërë thuajse një mision i pamundur. Sipas tyre, të vuash kaq shumë për të udhëtuar në destinacion ndodh vetëm në Shqipëri dhe sidomos drejt Elbasanit. Së fundi, me ndërtimin e tunelit të Krrabës shumë elbasanas udhëtojnë për të punuar në kryeqytet dhe ky transport nuk jua bën jetën të lehtë. Ankesat shpesh i merr era e askush nuk ka as dëshirë të flasë për një gjendje që i shqetëson të gjithë. /tesheshi.com/
