Dy vjet pas vdekjes në një atentat në “pragun e shtëpisë” – pra në hyrjen e pallatit ku banonte, ish-kryepolic Artan Cuku u shpall “Dëshmor i Atdheut”. Ishte ministri Lleshaj që ia dorëzoi titullin bashkëshortes së të ndjerit, e u shpreh për të
“Ai e mbylli jetën e tij në moshë të re pas një vrasje në mënyrë të pabesë. Të nderuar jemi mbledhur sot këtu për të nderuar jetën dhe veprën e tij i cili nga sot i bashkohet dëshmorëve të atdheut. I shprehim ngushëllime të afërmve të tij, që kanë pasur nderin dhe fatin ta kenë pranë vetes. Radha e gjatë e Dëshmorëve të Atdheut është shembulli i kontributit. Ky numër i lartë dëshmorësh duhet të shërbejë si një thrrje për reflektim të lartë ndaj të gjithe vendit por edhe ndaj klaës politike. Besimi i qytetarëve mund të fitohet vetëm përmes përkushtimit. Shembulli i Cukut është shembull vlerash të larta. I përjetshëm kujtimi i tij”, u shpreh Lleshaj.
Ndërkohë, bashkëshortja e Cukut rrëfeu mes lotësh:
“Tani ishte njeri me surpriza, një njeri gazmor, ishte një baba që kur dilte në darkë më familjen, nëse kishte muzikë në sfond ai ngrihej të kërcente me vajzën, këndonim të katërt. Për 6-vjetorin e martesës kishte bërë një pakt me prindërit e mi që të kujdeseshin dy ditë për vajzat. Kishte përgatitur një udhëtim në Venecia, dhe avioni nisej në 3 të mëngjesit, e pashë që nxori valixhen, e pyeta ku do shkosh ti sepse e dija që nuk kishte më udhëtime pune, e me thotë: kemi vetëm 30 minuta kohë, se ne do ikim diku për 6-vjetorin e martesës”, u shprehej Marjola, bashkëshortja e të ndjerit. /tesheshi.com/
