Nga Ahmet Zani
E ndërsa na ndodh shpesh që në fshatra të ndryshme të hasemi me sipërmarrës meshkuj, të cilët kujdesen për bujqësinë e blegtorinë, sot do t’ju tregojmë për Eda Toskën, fermeren në moshë të re që jeton në fshatin Ferras të Fierit. Vajza me shumë stërmundim ka ngritur këtë fermë me gjedhë, e madje ka punësuar dhe disa nga bashkëfshatarët e saj.
Po përse kjo vajzë 31-vjeçare merret me punët e blegtorisë? Përveçse pasioni i saj të rrisë të ardhurat duke përzgjedhur këtë profesion në shtimin e lopëve, ka dhe një arsye tjetër: babai i saj, Hyqmeti është i paralizuar, ndërsa një vëlla ndodhet jashtë kufijve të shtetit. Ai sjell të ardhura për t’i paraprirë punëve të blegtorisë, ndaj vajza ka zgjedhur këtë profesion në rritjen dhe mbarështimin e gjedhit duke ndërtuar një kompleks lopësh.
Edhe pse Eda është shumë e rregullt me tërë dokumentacionin, disa prej institucioneve po i vendosin shkopinj nën rrota aktivitetit të saj, duke e penguar në ecurinë e punëve.
Prej disa kohësh kjo vajzë endet nëpër zyrat e institucioneve për të drejtën e saj, pasi një pjesë të tokës po ia gllabërojnë nën hijen e pushtetit disa “të fortë” që i kanë zaptuar tokën. “Janë të pushtetshëm”,- tregon për ”
tesheshi.com” e reja që së fundmi kërkon mbështetje nga media.
Pjesa më e madhe e banorëve në këtë fshat merren me punët e korrjes së grurit apo dhe punë të ndryshme të stinës së verës. Ndërsa viziton fermën e Edës vë re se disa punëtorë sistemojnë dengjet me jonxhë në një magazinë të madhe si ushqim për blegtorinë në stinën e dimrit. Vetë Eda tregon se sasia e ushqimit dimëror është e pamjaftueshme sikundër në vitet e tjera, e kjo për shkak të rendimentit të tokës.
“Do të mundem të siguroj diku gjetkë pasi ushqimi i lopëve është çështje që kërkon zgjidhje”,- thotë Eda. Në fshat e në fermën e Edës nuk shihen lopët. Eda sqaron se ato ndodhen në një fshat tjetër dhe pasi ndez mjetin e saj të punës, një makinë që shërben për të udhëtuar dhe për transport, niset për në një fshat tjetër aty afër.
Udhëtimi zgjat përreth 20 minuta në një rrugë shumë të dëmtuar ,deri sa shfaqen tufa e lopëve, të cilat kishin ardhur nga kullota përreth një stani sajuar. Pranë tyre ndodheshin dy djem (barinj) që kujdeseshin për lopët dhe kryenin shërbimin atyre.
Fermerja e re sqaron se nga pamjatueshmëria e kullotës së bagëtive, ajo është detyruar të marrë një tjetër tokë në një tjetër fshat, duke paguar qiranë e saj.
“Unë do të rezistoj akoma dhe më shumë me këta njerëz e me këta pushtetarë që nuk mund të zbatojnë ligjet për t’i dhënë të drejtën pronarit”,- thotë vajza nga Ferrasi i Fierit.
“Do të sakrifikoj, madje për këtë pronë gjej rastin të informoj dhe drejtuesit më të lartë, pasi vendorët nuk denjojnë të merren me problemin që më rëndon mua dhe familjen time në tërësi. Unë po këmbëngul që i vetmi vëlla të mos kthehet në Shqipëri nga meraku, ndaj shpresoj tek ky publikim në media”,- shprehet 31-vjeçarja.
Është një sakrificë shumë e madhe njëkohësisht dhe investim po aq i konsiderueshëm në shtimin e kësaj ferme, e cila disa vite më parë është dëmtuar nga zjarri që përfshiu magazinat. “Tani është vërtetë e padurueshme të të marrin tokën tënde disa të ardhur nga zonat verilindore të vendit duke u përballur me një vajzë e papërkrahur. Shpresoj se institucionet do të ndërhyjnë tek problemi im që po më bren dita ditës”,- thotë me shpresë Eda për ‘tesheshi.com’.
