Donald Trump është presidenti i 45-të i Shteteve të Bashkuara të Amerikës!
Përkundër të gjitha parashikimeve, përkundër të gjitha sondazheve, përkundër të gjitha paralajmërimeve për atë çka nënkuptonte fitorja e tij, përkundër kundërvënies mediatike e më gjerë, përkundër çdo polemike që ai vetë e ka nisur, Donald Trump është fituesi i zgjedhjeve presidenciale.
Në 18 muaj është parë një prej fushatave elektorale më të ethshme, më të ashpra, në SHBA, e cila ka kulmuar me një debat televiziv të drejtpërdrejtë mes Trump-it e Clinton-it ku është shpërfaqur tërë tensioni i jashtëzakonshëm, aq sa rivalët nuk i kanë dhënë as duart njëri-tjetrit.
Por në fund të kësaj rruge buzëqeshja ka qenë për Donald Trump-in, që ia doli ta bënte realitet edhe një tjetër ëndërr, duke i sfiduar madje edhe anëtarët e partisë së tij, republikanët e pakënaqur me të.
Donald Trump ka patur një epërsi të madhe në votat elektorale, edhe pse diferenca në votat popullore ka qenë e ngushtë.
Presidenti i ri amerikan sapo ka folur para mbështetësve të tij, i shoqëruar nga e tërë familja.
“Faleminderit shumë!”, ka qenë fraza e tij e parë, duke i kushtuar më pas disa fjalë të ngrohta rivales Clinton.
“Sapo më telefonoi sekretarja Clinton. Ajo na uroi… për fitoren tonë, dhe unë e urova atë dhe familjen e saj për një fushatë të luftuar shumë, shumë fort. Ajo luftoi fare mirë. Hillary ka punuar për një kohë të gjatë dhe shumë fort, dhe ne i detyrohemi asaj një mirënjohje për vendin tonë.”
Trump ka premtuar se do të jetë president i të gjithë amerikanëve, e se është koha për bashkim për amerikanët.
“Unë them se është koha të bëhem një, si një popull i bashkuar. I premtoj çdo qytetari të tokës tonë se do të jem president për të gjithë amerikanët!”
“Duke punuar bashkë, ne kemi për të nisur detyrën e ngutshme të rindërtimit të vendit tonë…”
SHBA-ja ka lënë prapa një periudhë të tensionuar fushate. Tani vjen presidenca e republikanëve, e Donald Trump-it! /tesheshi.com/
