Federata Shqiptare e Futbollit i del në krah Ismail (Ballist) Morinës, duke i kërkuar autoriteteve shqiptare, të bëjnë të pamundurën për të mos lejuar ekstradimin e tij në Serbi. Në një njoftim zyrtar, FSHF bën thirrje të hapur autoriteteve përkatëse dhe institucioneve që të ndërhyjnë brenda kornizës ligjore për të ndaluar ekstradimin e Ismail Morinës në Serbi.
“Menjëherë pas publikimit në media të lajmit për vendimmarrjen e Gjykatës së Dubrovnikut në Kroaci për Ismail Morinën, i ndaluar ditë më parë, FSHF ka nisur menjëherë edhe interesimin e saj të drejtpërdrejtë, për t’i dhënë një zgjidhje sa më të shpejtë këtij problemi, shumë të ndjeshëm për tifozët dhe shqiptarët kudo qe ndodhen” – thuhet në njoftim.
FSHF thekson se do të ndjekë cdo rrugë ligjore dhe diplomatike për t’i shkuar deri në fund kësaj cështjeje, e për të moslejuar ekstradimin e Morinës në Serbi.
“FSHF është duke u marrë intensivisht me këtë problem, duke siguruar vetë Ismail Morinën, familjen, por edhe të gjithë tifozët shqiptarë, që do të shfrytëzojë të gjitha mundësitë që i jepen në mënyrë që një diçka e tillë të mos realizohet dhe ku hapësira ligjore ankimuese në Apel, të mundësojë edhe abrogimin e vendimit të Shkallës së Parë” – thuhet në njoftimin e Federatës Shqiptare të Futbollit. /tesheshi.com/
