Pak orë pas u regjistrua si kandidat për Bashkinë e Lezhës nën siglën e Bindjes Demokratike, Salvator Kaçaj, ish-kryetar komune në Shëngjin nga PD-ja, është tërhequr sërish, duke lënë pas një mesazh sqarues, por më shumë së kaq, hyje dyshimi për këtë tërheqje të beftë.
Gjithsesi, njeriu që dikur shkëlqente si futbollist i Besëlidhjes dhe i kombëtares shqiptare, aspirant dhe për kreun e FSHF-së, e ka bërë një sqarim publik.
“Gjatë gjithë jetës sime profesionale dhe politike kam qenë pjesë e shumë garave, shumicën e tij të cilave i kam fituar. Edhe propozimin për të përfaqësuar Bindjen Demokratike në 30 Qershor e vlerësova si një mundësi për të marrë pjesë në një garë për të mirën e Lezhës. Disa rrethana dhe informacione gjatë këtyre ditëve më kanë nxitur të rishikoj vendimin për të qenë kandidat në zgjedhjet e 30 Qershorit nën siglën e Bindjes Demokratike.
U jam mirënjohës qytetarëve dhe miqve të vërtetë që më bënë të kuptoj se ajo ku kisha pranuar të hyja nuk ishte një garë e vërtetë, por farsë në shërbim të pushtetit të Edi Ramës. Unë nuk mund të shërbej si fasadë e përpjekjes për të rikthyer në Shqipëri një regjim njëpartiak, të përzier me krimin. Është bindja ime më e thellë se zgjedhjet farsë, pa opozitën e vërtetë në 30 Qershor do të ishin shkatërrimtare për qytetarët e Lezhës dhe të të gjthë Shqipërisë.
Jo gjithmonë kam përkrahur vendimet politike të Partisë Demokratike, por gjykoj se beteja e opozitës për zgjedhje të lira e të ndershme është e drejtë dhe duhet përkrahur pa asnjë rezervë. Kjo e bën sot Partinë Demokratike të vetmen alternativë që përfaqëson realisht vlerat europiane. Për këto arsye, deklaroj largimin nga Bindja Demokratike dhe tërheqjen time nga kandidimi për Bashkinë e Lezhës, duke iu bashkuar kauzës së Partisë Demokratike dhe opozitës për mbrojtjen e demokracisë deri në fitore”, shkruan Salvador Kaçaj në mesazhin e tij të hapur.
Siç mund ta dallohet, te ai ka një pishmënllëk politik mbi zgjedhjen e bërë për t’u rreshtuar krah Patozit.
Akti i tij ngjan me atë të një prej nipërve të Mere Fizit te “Njeriu me Top”, që pasi zgjodhi të dilte partizan, më pas u tërhoq duke thënë nën lot: “U pendova z. Tosum, se dëgjova gjyshin e madh!”. Por ndodhi më pas që sërish u kthye te partizanët, që nuk dihet nëse dhe Kaçaj do rikthehet gjithashtu te Patozi. /tesheshi.com/
