Pothuajse 1 mijë e 300 njerëz janë vrarë dhe qindra janë plagosur në Siri pasi një seri tërmetesh të fuqishme me qendër në Turqinë juglindore goditi rajonin më të gjerë.
Numri i të vdekurve në zonat e kontrolluara nga regjimi u rrit në “1 mijë e 403 të plagosur dhe 570 të vdekur në provincat e Aleppo, Latakia, Hama, Tartus”, tha të hënën ministria e shëndetësisë e Sirisë.
Në pjesët e kontrolluara nga opozita në veriperëndim të vendit, të paktën 700 njerëz u vranë dhe më shumë se 1 mijë e 50 u plagosën, tha grupi i shpëtimit të Helmetave të Bardha, duke paralajmëruar se numri mund të rritet.
“Përpjekjet e shpëtimit në veriperëndim të Sirisë po përballen me vështirësi të jashtëzakonshme” sepse kërkohen pajisje të rënda, tha grupi, i cili operon në zonat e kontrolluara nga opozita të vendit të shkatërruar nga lufta.
Ekipet e tyre kanë kryer operacione kërkim-shpëtimi në terren.
Më herët tha se më shumë se 160 ndërtesa ishin shembur plotësisht, ndërsa 330 ishin rrafshuar pjesërisht dhe mijëra të tjera ishin dëmtuar.
Tërmeti goditi rajonet e kontrolluara nga opozita që janë të mbushura me rreth katër milionë njerëz të zhvendosur nga pjesë të tjera të Sirisë për shkak të luftës së gjatë civile të vendit.
Shumë prej tyre jetojnë në kushte të mjerueshme me pak kujdes shëndetësor me forcat e regjimit sirian të mbështetur nga Rusia që rrethojnë zonën dhe ndonjëherë kryejnë sulme ajrore.
Dhjetëra ndërtesa u shkatërruan ose u dëmtuan gjithashtu. Punonjësit e shpëtimit thanë se spitalet në zonë ishin mbushur plot.
Raed Salah, kreu i Helmetave të Bardha, organizata e emergjencës në zonat e kontrolluara nga opozita, tha se lagje të tëra u shembën në disa zona.
“Ky tërmet është më i forti që nga themelimi i Qendrës Kombëtare të Tërmeteve në vitin 1995,” tha Raed Ahmed, i cili drejton qendrën, për agjencinë shtetërore të lajmeve SANA.
Lëkundje të forta goditën rajonet Idlib, Aleppo, Hama, Latakia, Tartus dhe Raqqa të Sirisë, duke shkaktuar shkatërrime të mëdha, raportoi SANA. /tesheshi.com/
