Ministri gjerman i Ekonomisë, Robert Habeck, deklaroi se dy terminalet e parë të përkohshëm të LNG-së në vend, të cilat duhet të kontribuojnë në përfundimin e varësisë nga burimet ruse të energjisë, do të vihen në funksion në fund të këtij viti ose në fillim të 2023.
Qeveria gjermane ka dhënë me qira katër terminale lundrues për gazin natyror të lëngshëm, tha ministri për gazetën Sonntag.
Dy anije janë tashmë të disponueshme këtë vit, dhe në kalimin nga viti 2022 në 2023, ato do të vendosen në Wilhelmshaven, një qytet bregdetar në Detin e Veriut dhe Brunsbuettel, në grykën e Elbës, afër Detit të Veriut.
Moska tashmë ka reduktuar ndjeshëm furnizimet me gaz që mbërrijnë në Gjermani nëpërmjet tubacionit të gazit, ndërsa Berlini po kërkon burime të tjera energjie.
Klaus Muller, kreu i Agjencisë së Rrjetit të Gjermanisë, e cila mbikëqyr rrjetet e furnizimit me energji, tha se kishte frikë nga një pezullim i plotë i gazit rus në Gjermani.
Ai paralajmëroi se riparimi i ardhshëm i gazsjellësit Rrjedha Veriore 1 mund të kthehet në një “rregullim politik afatgjatë”.
Muller u bëri thirrje qytetarëve të reduktojnë konsumin e energjisë. /tesheshi.com/
