Dy ish-numrat një të botës në tenisin e meshkujve do të dhurojnë një tjetër përplasje mes tyre kur të takohen në çerekfinalet e turneut Indian Wells Masters. Një përplasje që vjen vetëm dy muaj pas asaj fitoreje për zvicerianin Roger Federer në finalen e të parit turne Grand Slam të vitit, në Australian Open.
Takimi i 36-të mes tyre, në 23 prej të cilëve ka dalë fituese Rafael Nadal, u vendos nga fitoret respektive 2-0 ndaj kundërshtarëve. Por ndërsa Nadal e pati më të lehtë ndaj një tjetër spanjolli, Fernando Verdasco-s, Federer vuajti ndaj amerikanit Steve Johnson, me setet e mbyllura ngushtësisht 7-6, 7-6.
“Ai ka talentin për t’i bërë shumë të vështira gjëra që duken shumë të lehta,” deklaroi Nadal për kundërshtarin e tij të ardhshëm në këtë turne.
“Kjo është arsyeja pse jam këtu, të luaj kundër djemve si Rafa (Nadal),” u përgjigj Federer, pa e fshehur entuziazmin për një tjetër ndeshje ndaj rivalit të tij më të madh në karrierë.
“Eshtë diçka e madhe për tenisin. Eshtë emocionuese për Rafa-n dhe për mua,” shtoi fituesi i 18 titujve Grand Slam.
Federer e ka fituar katër herë trofeun e turneut Indian Wells Masters; Nadal ka një trofe më pak të fituar në të njëjtin turne.
Përplasja çerekfinale mes Nadal-it dhe Federer-it do të nisë pak pas mesnate me orën tonë, në 01:00 të 16 marsit. /tesheshi.com/
