Nga Jeton ZENUNI
Dy fshatra të ndryshme, dy kauza të ndryshme por kanë të njëjtin qëllim: të shpëtojnë jetën e pacientëve në nevojë.
Fshati Carrabreg i Deçanit me organizimin e Këshillit të fshatit, sot përkujton dëshmorët dhe të rënët e fshatit të tyre, duke dhuruar gjak.
Me moton “Carrabregu dhuron gjak”, në një aktivitet tashmë tradicional, banorët e këtij fshati, të emocionuar thonë se “bijtë e këtij fshati derdhën gjakun që ne të gëzojmë lirinë sot, ndërsa ne sot, po japim gjak që të shpëtojmë jetën e të sëmurëve në nevojë”.
Hysen Sadriu, drejtor i Qendrës Kombëtare të Transfuzionit të Gjakut në Prishtinë, shprehet shumë i kënaqur me përgjigjen e qytetarëve për t’u bërë pjesë e dhurimit të gjakut dhe shprehet falendërues e mirënjohës për organizatorët e këtij aktiviteti dhe qytetarët e këtushëm.
Në një fshat tjetër, Banullë, të komunës së Lipjanit, banorët kanë filluar tubohen në xhaminë e fshatit për të falur namazin e drekës. Por, ata do të kryejnë edhe një obligim tjetër në xhami: do t’i përgjigjen ftesës së imamit të xhamisë së këtij fshati, Habib Olluri, për të dhuruar gjak për nevojat e spitaleve të Qendrës Kombëtare Universitare të Kosovës.
“Nën moton “Mirë se vjen muaj i bekuar”, këshilli organizativ i xhamisë së fshatit Banullë, ka vendosur që të organizojë këtë aktivitet humanitar për nder të muajit të shenjtë të Ramazanit, aktivitet ky i cili shpresojmë të bëhet tradicional”, – tha kryetari i Këshillit të Bashkësisë Islame për komunën e Lipjanit, Xhevdet Bytyqi.
Një prej dhuruesve të gjakut, i cili jeton afër xhamisë së fshatit, hoxha dr.Sedat Rrustemi, thotë se “të japësh diç të shtrenjtë nga vetja jote pa kërkuar asnjë kompensim për të, të bën të ndjehesh vërtetë mirë”. Ai shprehet se një ajet në Kuran thuhet: “të shpëtosh një jetë njeriu është sikur të kesh shpëtuar gjithë njerëzimin”.
“Dhurimet e gjakut fillojnë të zvogëlohen çdo vit gjatë muajve të verës. Duke qenë se këtë vit muaji i Ramazanit bie m’u në stinën e verës, këto doza të gjakut në vigjilje të fillimit të Ramazanit janë shumë të mirëseardhura për qendrën tonë”, thonë nga ekipi i Qendrës për Transfuzion të Gjakut.
“Jetëgjatësia e një doze të gjakut është e kufizuar, ndërkaq spitalet në QKUK gjatë gjithë kohës kanë nevojë të vazhdueshme për gjakun e njerëzve të shëndoshë”, shprehen ata të kënaqur me thirrjen e popullatës së fshatit në këtë aktivitet humanitar. /tesheshi.com/
