Në një moment kur gjithë vëmendja është përqendruar tek ‘shahu” mes Bashës dhe Ramës, dy aleatë të vegjël në krahun opozitar kanë tentuar të faktorizohen duke bërë një lëvizje politike që ul gjakrat e acarura në politikë.
Agron Duka, kreu i Partisë Agrare Ambientaliste dhe Fatmir Mediu, kreu i Partisë Republikane u janë drejtuar me një ftesë partive parlamentare për një takim në orën 20:00 të mbrëmjes së sotme tek Kryesia e Kuvendit.
“Ftojmë krerët e partive parlamentare në orën 20:00 tek Kryesia. SHBA ka ofruar propozimet dhe mbështetjen e saj për zgjidhjen e krizës. Ju ftojmë të arrijmë një marrëveshje për një proces zgjedhor të lire”- thonë aleatët e Bashës.
Iniciativa e tyre ka qenë spontane dhe pa një organizim ose negocim të mëparshëm me kolegët partive të tjera, bëjnë të ditur burime për tesheshi.com.
Nga ana tjetër ajo duket e pakuptimtë në këtë situatë kur lojën po e luajnë të mëdhenjtë. Plus që nuk kanë tagrin që të thërrasin një tryezë të tillë, të cilën e thirri kryetari i Kuvendit Ilir Meta disa javë më parë, por e bojkotuan të gjitha partitë e opozitës, Vetëm Duka vajti sa për të përshëndetur Metën, për hir të miqësisë personale, dhe u largua nga tryeza duke e nxjerrë atë të pavlefshme. Nëse dy partitë e mëdha PD-ja dhe PS-ja nuk marrin pjesë në tryezë sipas të gjitha gjasave incitiava e dyshes Duka-Mediu do të dështojë./tesheshi.com
