I jashtëzakonshëm ka qenë fjalori që ka përdorur presidenti i Filipineve karshi Kishës Katolike, duke e akuzuar atë si të korruptuar, siç i ka akuzuar priftërinjtë për abuzim seksual.
Duke folur në një veprimtari përkujtimore, Rodrigo Duterte u ka thënë të pranishmëve të lexojnë një libër, “Altari i sekreteve” të Aries Rufo-së, për të zbuluar të fshehtat rreth zyrtarëve të Kishës. Duterte ka deklaruar se do të tërhiqej nëse deklarimet nuk rezultonin të vërteta.
Ai, po ashtu, ka thënë se mund të shkruante një libër mbi Kishën, të cilin do ta titullonte, “Hipokrizi”.
Ndërsa ka lëshuar fjalë të rënda për Kishën Katolike, për korrupsionin dhe rendjen pas grave të klerikëve të saj, Duterte ka shtuar: “Unë e sfidoj Kishën Katolike…”
Polemizues sa më s’bëhet, presidenti zhurmëmadh ka sjellë në vëmendje kërkesën e bërë qeverisë nga Kisha për një makinë të shtrenjtë, “A nuk duhet t’u vijë turp? Ajo është aq e shtrenjtë, ndërsa shumë njerëz nuk kanë asgjë për të ngrënë!”
Kisha në vend ka ngritur zërin kundër luftës së ashpër së presidentit Duterte ndaj drogës e të përfshirëve në tregtinë dhe përdorimin e saj, një fakt më shumë që e ka shtyrë kreun e shtetit t’i kundërvihet. Duterte ka nënvizuar se i ka fituar zgjedhjet pavarësisht nga paralajmërimeve e Kishës kundër figurës së tij. /tesheshi.com/
