Dritan Demiraj, ish-ministri teknik i Brendshëm që një javë më parë dorëzoi detyrën te Fatmir Xhafaj, përshëndet nismën e këtij të fundit për të verifikuar me imtësi çdo punonjës të Policisë së Shtetit.
Bëhet fjalë për 11 mijë punonjës, të strukturave të ndryshme të policisë, që në fillim të vitit 2018 do të kalojnë në testin e verifikimit.
Demiraj thekson se nëse kjo nismë do të realizohet në mënyrë të ndershme, shumë punonjës policie, të të gjitha niveleve, do të ikin nga rradhët e uniformave bllu, sit ë përfshirë në aktivitete kriminale.
Ish-ministri teknik i emëruar nga Partia Demikratikë sqaron për “Shqiptarja.com” se nuk beson në asnjë moment se kjo nismë do të përndjekë dhe do largojë nga rradhët e policisë së Shtetit, policë që nuk dëshirohen nga pushteti.
Sipas tij, Policia e Shtetit pati një valë largimesh gjatë vitit 2013-2014 dhe kjo nismë e atëhershme, sot ka sjellë një faturë mjaft të madhe buxhetore. “Dhjetra milionë dollarë investime në personel, të financuara nga qeveria shqiptare dhe BE dhe SHBA-të kanë shkuar dëm”, thotë Demiraj
Zoti Demiraj, ministri i Brendshëm Fatmir Xhafaj sapo ka marë detyrën ka firmosur një urdhër për ngritjen e në grupi pune që do të hartojë bazën ligjore me qëllim kalimin e çdo efektivi policie në proces Vettingu. Në opinionin tuaj çfarë do të thotë kjo nismë?
Në lidhje me urdhërin e z.Fatmit Xhafaj për urdhërin për ngritjen e një grupi pune që do të hartojë bazën ligjore me qëllim kalimin e çdo efektivi policie në proces “Vettingu”. Kjo është një nismë shumë e mirë e cila bëhet në një moment deçiziv dhe shumë të rëndësishme për sendin në kuadrin e luftës kundër kanabisit, drogave të forta dhe luftës kundër korrupsionit. Policia e Shtetit këtë vit ka qënë e angazhuar fuqimisht në luftën kundër kanabisit, por është shumë e rëndësishme që ajo të pastrojë radhët e saj nga personat të cilët lejuan kanabistizimin e pothuajse të gjithë Shqipërisë. Nëse kjo nismë do të realizohet në mënyrë të ndershme jam shumë i sigurtë se do ikin shumë puonjës policie nga të gjithë nivelet e drejtimit të Policisë së Shtetit, të përfshirë në këtë aktivitet kriminal.
A ka vend për të shqetësuar se vettingu në polici do përdoret për të larguar nga rradhët e policisë efektivë që nuk dëshirohen nga pushteti aktual? Pra si të thuash do jetë një procedurë hakmarëse…
Unë nuk mendoj aspak se vettingu në polici do të përdoret për të larguar nga rradhët e policisë efektivë të cilët nuk dëshirohen nga pushteti aktual. Partia Socialise kur mori pushtetin në vjeshtën e vitit 2013 largoi nga puna qindra punonjës policie pa asnjë shkak apo arsye nga të gjithë nivelet e zinxhirit komandues të policisë duke krijuar një problem shumë të madh social dhe ligjor. Dhjetra milionë dollarë investime në personal të financuara nga qeveria shqiptare dhe BE dhe SHBA-të.
Gjatë kohës që ju shërbyet si ministër i Brendshëm teknik, cilat sektorë të policië e Shtetit kanë qënë sektorët e riskut që elementë kriminalë bashkëpunonin dhe korruptonin policët?
Gjatë kohës që sherbeva si MPB kam parë me sytë e mi dhjetëra punonjës të ndershëm policie shumë të mobilizuar dhe të ndershëm të cilët i kanë shërbyer dhe i shërbejnë me ndershmëri vendit, por në këtë korpus policie ka dhe struktura të cilat kanë qënë në bashkëpunim me kriminelë dhe grupe të fuqishme kriminale të cilat në bashkëpunim me ta lejuan këtë veprimtari, e cila i bëri një dëm imazhit të vendit tonë në arenën ndërkombëtare.
Çfarë ndikimi mund të sjellë vettingu për policinë, në kultivimin dhe trafikimin e lëndëve narkotike dhe korrupsionit në polici?
Vettingu do të sjellë pastrimin një herë e mirë të rradhëve të policisë nga personat të cilat kanë qënë të lidhur dhe i shërbejnë njerëzve të pasur dhe që vahzdojnë të blejnë influencën politike në Shqipëri.
Ju qëndruat disa muaj në krye të ministrisë së Brendshme. Cila nga sektorët e këtij dikasteri dhe institucionet vartëse të saj, kishte problematikë në drejtim dhe menaxhim të punës hetimore,zbuluese dhe indetifikuese?
Gjatë kohës time në MPB padyshim vlerësoj punën shumë të mirë të shumicës së policisë të cilat janë gjithë kohës në krye të detyrës, por më duhet të them që policia shqiptare është shumë e politizuar, ka nevojë që të rrisë profesionalizmin dhe performancën. Qeveria Shqiptare duhet të bëjë shumë më tepër për policinë në drejtim të rritjes së pagave, përmirësimit të mjeteve dhe pajisjeve që kërkon realizimi i detyrës, mbështetjes morale dhe ligjore, kushteve të punës, dhe të pastrojë rradhët e saj nga disa drejtues që janë të përfshirë në veprimtari të kundërligjshme./tesheshi.com/
